Live Updates

ثناء میر نے پاکستان ویمن کرکٹ کو بین الاقوامی سطح پر نئی پہچان دی،شازیہ کیانی ایڈووکیٹ

پیر 16 جون 2025 14:33

مظفرآباد (اُردو پوائنٹ اخبارتازہ ترین - این این آئی۔ 16 جون2025ء)نامور قانون دان،معروف سیاسی وسماجی رہنما شازیہ کیانی ایڈووکیٹ نے سابق ویمن کرکٹ ٹیم کپتان ثناء میر کو لارڈز کرکٹ گراؤنڈ میں ٹیسٹ چیمپئن شپ فائنل کے دوران تاریخی اعزاز حاصل کرنے پر زبردست خراجِ تحسین پیش کیا ہے۔

(جاری ہے)

اپنے ایک بیان میں شازیہ کیانی ایڈووکیٹ نے کہا کہ ثناء میر کا آئی سی سی ہال آف فیم میں شامل ہونا اور لارڈز میں روایتی بیل بجا کر کھیل کا آغاز کرنا نہ صرف پاکستان بلکہ تمام جنوبی ایشیائی خواتین کھلاڑیوں کے لیے باعثِ فخر اور حوصلہ افزائی ہے۔

انہوں نے کہا کہ ثناء میر نے اپنی قیادت، کارکردگی اور مثالی رویے سے پاکستان ویمن کرکٹ کو بین الاقوامی سطح پر نئی پہچان دی۔انہوں نے 226 بین الاقوامی میچز میں پاکستان کی نمائندگی کی اور 151 وکٹوں کے ساتھ ساتھ 1,630 رنز بنا کر ایک کامیاب آل راؤنڈر کی حیثیت سے اپنا لوہا منوایا۔انھوں نے کہا کہ نوجوان لڑکیوں کے لیے ثناء میر ایک روشن مثال ہیں،جنہوں نے ثابت کیا کہ لگن،قابلیت اور قیادت کی خصوصیات کے ساتھ ہر میدان میں کامیابی حاصل کی جا سکتی ہے۔