فیصل آباد،پولٹری فارمرز کو مرغیوں کو بیماریوں سے بچانے کے لئے حفاظتی ٹیکے لگوانے کی ہدایت

منگل 17 جون 2025 16:40

فیصل آباد (اُردو پوائنٹ اخبارتازہ ترین - اے پی پی۔ 17 جون2025ء) محکمہ لائیو سٹاک نے پولٹری فارمرز کو شدید گرمی کے باعث مرغیوں کو رانی کھیت اور فاؤل پاکس جیسی بیماریوں سے بچانے کے لئے حفاظتی ٹیکے لگوانے کی ہدایت کی ہے۔

(جاری ہے)

محکمہ لائیو سٹاک و ڈیری ڈویلپمنٹ فیصل آباد کے ڈویژنل ڈائریکٹر ڈاکٹرندیم بدرنے اے پی پی سے گفتگو کرتے ہوئے کہا ہے کہ دیہی مرغی پال حضرات اور پولٹری فارمرز ہر 2ماہ بعد ایک مرتبہ اپنی مرغیوں کو رانی کھیت اور فاؤل پاکس جیسے امراض سے بچانے کے لئے حفاظتی ٹیکے ضرور لگوائیں تاکہ انہیں ماحولیاتی تبدیلیوں اور موسمی اثرات کے باعث کسی مالی نقصان کا سامنا نہ کرنا پڑے۔

انہوں نے کہا کہ محکمہ لائیو سٹاک کے حکا م پولٹری فارمرز کی معاونت کے لئے ہمہ وقت دستیاب ہیں لہٰذاحفاظتی ٹیکے گھر کے قریب ویٹرنری ہسپتالوں یا لائیو سٹاک ڈسپنسریوں سے لگوائے جا سکتے ہیں۔ انہوں نے بتایا کہ اس ضمن میں ایک ہیلپ لائن بھی قائم ہے لہٰذا پولٹری فارمرزفری ہیلپ لائن پر رابطہ کر کے مزید معلومات، مشاورت یا رہنمائی حاصل کر سکتے ہیں۔