ڈی ایل ای اور ایس ای سی پی نے سپریم کورٹ عمارت میں ایم او یوپر دستخط کردیئے

بدھ 18 جون 2025 21:10

اسلام آباد (اُردو پوائنٹ اخبارتازہ ترین - این این آئی۔ 18 جون2025ء)ڈائریکٹوریٹ آف لیگل ایجوکیشن (ڈی ایل ای) اور سیکیورٹیز اینڈ ایکسچینج کمیشن آف پاکستان نے سپریم کورٹ کی عمارت میں مفاہمت کی یادداشت (ایم او یو)پر دستخط کی تقریب کا انعقاد کیا۔ وفاقی وزیر قانون نے تقریب میں بطور مہمان خصوصی شرکت کی۔ ایم او یو پر بیرسٹر اسامہ ملک ڈائریکٹر، ڈائریکٹوریٹ آف لیگل ایجوکیشن اور کمشنر ایس ای سی پی مجتبیٰ لودھی نے اپنے اپنے اداروں کی طرف سے دستخط کئے۔

ایم او یو کا مقصد وکلاء اور قانون کے طلباء کیلئے کارپوریٹ، کمپنی، بینکنگ اور انشورنس قوانین کے موضوعات پر تربیت کو فروغ دینے کے لیے دونوں اداروں کے درمیان تعاون کو بڑھانا ہے۔ ڈائریکٹوریٹ آف لیگل ایجوکیشن، ایس ای سی پی کے پراسیکیوٹرز اور اندرون ملک قانونی مشیروں کے لیے تربیت کی سہولت بھی فراہم کرے گا۔

(جاری ہے)

تقریب میں چیئرمین ایس ای سی پی عاکف سعید، کمشنر ایس ای سی پی مجتبیٰ لودھی، کمشنر ایس ای سی پی ذیشان خٹک اور کمشنر ایس ای سی پی مظفرمرزانے شرکت کی۔

تقریب میں ممبر پاکستان بار کونسل احسن بھون، چیئرمین لیگل ایجوکیشن کمیٹی قلب حسن شاہ ممبر پاکستان بار کونسل امجد شاہ اور رؤف عطا صدر سپریم کورٹ بار ایسوسی ایشن نے بھی شرکت کی۔ وزیر قانون نے اس تعاون کو سراہا اور وکلاء کیلئے قانونی تعلیم کو بڑھانے کی ضرورت پر زور دیا۔ چیئرمین ایس ای سی پی نے بھی اس کاوش کو سراہا اور ایس ای سی پی کی جانب سے اس سلسلے میں مکمل تعاون کا یقین دلایا۔ بیرسٹر اسامہ ملک نے کہا کہ یہ ایم او یو دونوں اداروں کے درمیان دیرپا تعاون کا آغاز ہے جو وکلاء ، قانون کے طلباء اور ایس ای سی پی کے عملے کیلئے قانونی تربیت کے معیار کو بہتر بنائے گا۔