کنٹرولڈ ماحولیاتی ٹیکنالوجی کے ذریعے سبزیوں اور پھلوں کو زیادہ دیر تک محفوظ رکھا جاسکتاہے، ماہرین جامعہ زرعیہ

جمعرات 19 جون 2025 16:35

فیصل آباد (اُردو پوائنٹ اخبارتازہ ترین - اے پی پی۔ 19 جون2025ء) پاکستان سمیت دنیا بھر میں سبزیوں اور پھلوں کی بہترین پیداوار حاصل ہو رہی ہے تاہم مناسب انتظامات نہ ہونے کے باعث ان کی بڑی تعداد ضائع اور خراب ہو جاتی ہے لہٰذا اگر پاکستان کے ساتھ ساتھ دنیا کے دیگر ممالک میں کنٹرولڈ ماحولیاتی ٹیکنالوجی کو فروغ دیا جائے تو اس سے نہ صرف سبزیوں اور پھلوں کو زیادہ دیر تک محفوظ رکھا جاسکتاہے بلکہ اس ٹیکنالوجی کے باعث بحری راستے سے کم خرچ میں پھلوں اور سبزیوں کی بڑی کھیپ دور دراز بیرون ممالک کو بھی بھجوائی جا سکتی ہے۔

جامعہ زرعیہ فیصل آباد کے زرعی ماہرین نے بتایا کہ سمندری راستو ں سے چالیس فٹ کے کنٹینر میں بیس ٹن آم برآمد کئے جا سکتے ہیں لہٰذا پاکستان کو اپنی بہتر آم کی قسموں کو باہر کی دنیا میں بھجوانے کیلئے سنجیدگی سے کاوشیں بروئے کار لانا ہوں گی۔

(جاری ہے)

انہوں نے بتایا کہ یہاں آم،کینو، سیب، سبز مرچ اور دیگر سبزیات کو زیادہ عرصے تک محفوظ رکھنے کیلئے کامیاب تجربات کئے جا رہے ہیں انہوں نے کہا کہ پاکستان میں پھلوں اور سبزیوں کی سالانہ پیدا وار پندرہ ملین ٹن ہے جس میں سے تقریباً4 فیصد برآمد کی جاتی ہیں 70 فیصد مقامی سطح پر استعمال ہوتی ہیں اور باقی مقدار مناسب بعد از برداشت دیکھ بھال نہ ہونے کی وجہ سے ضائع ہو جاتی ہے۔