دبئی میں بس اور میرین ٹرانسپورٹ سٹیشنوں پر مفت وائی فائی سروس فراہم

یہ سروس روزمرہ کے سفر کو مزید آرام دہ اور فائدہ مند بنانے کے لیے فراہم کی جا رہی ہے تاکہ دبئی کو دنیا کا سب سے زیادہ اسمارٹ اور خوشحال شہر بنانے کے ہدف میں تعاون حاصل ہو؛ آر ٹی اے

ساجد علی جمعرات 19 جون 2025 16:06

دبئی ( اُردو پوائنٹ اخبارتازہ ترین۔ 19 جون 2025ء ) دبئی میں بس اور میرین ٹرانسپورٹ سٹیشنوں پر مفت وائی فائی سروس فراہم کردی گئی۔ سرکاری اماراتی نیوز ایجنسی وام کے مطابق دبئی کی روڈز اینڈ ٹرانسپورٹ اتھارٹی (آر ٹی اے) نے 21 پبلک بس سٹیشنوں اور 22 میرین ٹرانسپورٹ سٹیشنوں پر مفت وائی فائی سروس کی فراہمی شروع کردی ہے، اس حوالے سے اتھارٹی نے اپنے ایک بیان میں کہا ہے کہ ای اینڈ کے تعاون سے یہ سروس فراہم کی گئی ہے، پبلک ٹرانسپورٹ کے سفر کے دوران مسافر اپنے سمارٹ فون، ٹیبلٹ اور لیپ ٹاپ پر مفت وائی فائی استعمال کرسکتے ہیں۔

بتایا گیا ہے کہ یہ سروس روزمرہ کے سفر کو مزید آرام دہ اور فائدہ مند بنانے کے لیے فراہم کی جا رہی ہے تاکہ دبئی کو دنیا کا سب سے زیادہ سمارٹ اور خوشحال شہر بنانے کے ہدف میں تعاون حاصل ہو، یہ اقدام تمام خدمات میں ڈیجیٹل تبدیلی کو تیز کرنے کی مسلسل کوششوں کا حصہ ہے جو متحدہ عرب امارات کے وژن کے مطابق ہے، وائی فائی سروس کی توسیع اور اسے مزید بہتر بنانے کے لیے جائزہ لیا جاتا رہے گا تاکہ بسوں اور میرین ٹرانسپورٹ استعمال کرنے والے مسافروں کے لیے معیاری رابطے کو یقینی بنایا جا سکے۔

(جاری ہے)

بتایا جارہا ہے کہ عید الاضحیٰ کی تعطیلات کے دوران 75 لاکھ 77 ہزار افراد نے پبلک ٹرانسپورٹ، شیئرڈ ٹرانسپورٹ ٹیکسی سروس استعمال کی جو گزشتہ سال کے اسی عرصے کے مقابلے میں 14 فیصد زیادہ ہے، میٹرو کی ریڈ اور گرین لائن پر مسافروں کی تعداد 27 لاکھ 86 ہزار رہی، ٹرام سروس سے ایک لاکھ 19 ہزار 917 مسافروں نے سفر کیا، پبلک بس سروس میں مسافروں کی مجموعی تعداد 16 لاکھ 63 ہزار ریکارڈ کی گئی جب کہ 3 لاکھ 7 ہزار 684 افراد نے اپنے سفر کے لیے میرین ٹرانسپورٹ کا انتخاب کیا۔