Live Updates

پنجاب کی تمام طبی درسگاہوں کے معاملات کے حل کیلئے یکساں پالیسی لانا چاہتے ہیں‘خواجہ سلمان رفیق

عوام کے ٹیکسوں سے بنائے گئے سرکاری ہسپتالوں کو صحت کی بہترین علاج گاہیں بنانا ہمارا عزم ہے‘وزیر صحت پنجاب

جمعرات 19 جون 2025 17:27

پنجاب کی تمام طبی درسگاہوں کے معاملات کے حل کیلئے یکساں پالیسی لانا ..

لاہور (اُردو پوائنٹ اخبارتازہ ترین - این این آئی۔ 19 جون2025ء) صوبائی وزیر صحت خواجہ سلمان رفیق کی زیر صدارت محکمہ سپیشلائزڈ ہیلتھ کیئر اینڈ میڈیکل ایجوکیشن میں نشتر میڈیکل یونیورسٹی کا 17 واں سینڈیکیٹ اجلاس منعقدہوا۔اجلاس میں ایڈیشنل سیکرٹری امیر محمد، ایڈیشنل سیکرٹری سدرہ سلیم اور ڈائریکٹر بجٹ اینڈ اکاونٹس حماد الرب نے شرکت کی۔وڈیو لنک کانفرنس کے ذریعے رکن پنجاب اسمبلی رانا عبدالمنان ساجد، وائس چانسلر نشتر میڈیکل یونیورسٹی پروفیسر مہناز خاکوانی، وائس چانسلر کنگ ایڈورڈ میڈیکل یونیورسٹی پروفیسر محمود ایاز، محمد عثمان طاہر و دیگر محکمہ جات کے افسران و سینڈیکیٹ ممبران نے شرکت کی۔

سینڈیکیٹ اجلاس کے دوران مختلف ایجنڈاز کے مندرجات پیش کئے گئے۔

(جاری ہے)

اجلاس کے دوران نشتر میڈیکل یونیورسٹی کے 16 ویں سینڈیکیٹ اجلاس کے منٹس کی منظوری دی گئی۔سینڈیکیٹ اجلاس کے دوران نشتر میڈیکل یونیورسٹی میں بی ایس ٹیکنالوجی پروگرامز اور سیٹوں میں اضافے کی منظوری دی گئی۔ اجلاس کے دوران ایم ڈی، ایم ایس اور ایچ این ڈی کے کری کولا کی منظوری دی گئی ۔

سینڈیکیٹ اجلاس کے دوران نشتر میڈیکل یونیورسٹی کو ایگزیمینیشن ڈیپارٹمنٹ کی توسیع کرنے کی منظوری دی گئی۔اجلاس کے دوران ڈاکٹر سید احمر حسین کو رجسٹرار یونیورسٹی کا اضافی چارج دینے کی منظوری دی گئی۔ سینڈیکیٹ اجلاس کے دوران پروفیسر مسعود الراوف کی سرجری اینڈ الائیڈ ڈیپارٹمنٹ کے بطور ڈین تعیناتی کی منظوری کے علاوہ ڈائبٹیز پروگرام میں ڈپلومہ کی منظوری دی گئی۔

صوبائی وزیر صحت خواجہ سلمان رفیق نے کہاکہ پنجاب کی تمام طبی درسگاہوں کے معاملات کے حل کیلئے یکساں پالیسی لانا چاہتے ہیں۔ پنجاب کے سرکاری ہسپتالوں میں ادویات کی فراہمی پر کوئی سمجھوتہ نہیں کیا جا رہا۔سرکاری ہسپتالوں کے معاملات کے حل کیلئے طبی درسگاہوں کے سینڈیکیٹ اجلاس متواتر کروانے کی ہدایات جاری کی گئی ہیں۔ خواجہ سلمان رفیق نے کہاکہ عوام کے ٹیکسوں سے بنائے گئے سرکاری ہسپتالوں کو صحت کی بہترین علاج گاہیں بنانا ہمارا عزم ہے۔صوبائی وزیر صحت نے پنجاب کی تمام طبی درسگاہوں کو معیاری ریسرچ پروان چڑھانے کی ہدایت کی۔