ایڈیشنل ڈپٹی کمشنر جنرل ڈاکٹر عبدالشکور کی زیر صدارت ڈسٹرکٹ ہیلتھ کمیٹی کا اہم اجلاس

جمعرات 19 جون 2025 23:00

کوئٹہ (اُردو پوائنٹ اخبارتازہ ترین - اے پی پی۔ 19 جون2025ء) ایڈیشنل ڈپٹی کمشنر جنرل ڈاکٹر عبدالشکور کی زیر صدارت ڈسٹرکٹ ہیلتھ کمیٹی کا اہم اجلاس منعقد ہوا، جس میں ضلع گوادر کو صحت کے شعبے میں درپیش چیلنجز اور ان کے دیرپا حل پر تفصیل سے غور کیا گیا۔اجلاس میں ڈسٹرکٹ ہیلتھ آفیسر ڈاکٹر عبداللطیف دشتی، ڈسٹرکٹ سپورٹ منیجر پی پی ایچ آئی ڈاکٹر مرشد دشتی، ڈاکٹر فاروق بلوچ، ایکسین بی اینڈ آر احتشام سمیت دیگر متعلقہ اداروں کے نمائندگان نے شرکت کی۔

اجلاس کے دوران بنیادی مراکز صحت، دیہی علاقوں میں طبی سہولیات کی دستیابی، ادویات کی فراہمی، عملے کی حاضری، ایمبولینس سروس، اور زیر تعمیر طبی مراکز کی پیش رفت پر مفصل تبادلہ خیال کیا گیا۔ شرکاء نے اپنی اپنی سطح پر درپیش رکاوٹوں اور بہتری کے ممکنہ اقدامات پر تجاویز پیش کیں۔

(جاری ہے)

ایڈیشنل ڈپٹی کمشنر نے اجلاس سے خطاب کرتے ہوئے کہا کہ صحت کے شعبے کی بہتری ضلعی انتظامیہ کی اولین ترجیح ہے، اور تمام اداروں کو باہمی تعاون سے عوام کو معیاری طبی سہولیات کی فراہمی یقینی بنانی ہوگی۔

انہوں نے متعلقہ افسران کو ہدایت کی کہ طبی مراکز کی نگرانی کو مؤثر بنایا جائے اور عوامی شکایات کا بروقت ازالہ کیا جائے۔اجلاس کے اختتام پر آئندہ کے لائحہ عمل اور فالو اپ اجلاس کے شیڈول پر بھی اتفاق کیا گیا تاکہ فیصلوں پر عملدرآمد کی مؤثر نگرانی جاری رکھی جا سکے۔