Live Updates

ایران کا اسرائیلی حملے رکنے تک کسی سے بھی مذاکرات نہ کرنے کا اعلان

مغربی ممالک جانتے ہیں کہ اسرائیل تمام بین الاقوامی قوانین اور قراردادوں کی خلاف ورزی کررہا ہے لیکن پھر بھی مغربی ممالک ایران کے خلاف اسرائیل کی جارحیت کی مذمت نہیں کر رہے ہیں، عباس عراقچی کی سرکاری میڈیا سے گفتگو

فیصل علوی جمعہ 20 جون 2025 14:26

ایران کا اسرائیلی حملے رکنے تک کسی سے بھی مذاکرات نہ کرنے کا اعلان

تہران(اردوپوائنٹ اخبار تازہ ترین۔20جون 2025)ایران نے اسرائیلی حملے رکنے تک کسی سے بھی مذاکرات نہ کرنے کااعلان کر دیا، ایرانی سرکاری میڈیا سے بات چیت کرتے ہوئے ایرانی وزیرخارجہ عباس عراقچی نے کہا کہ جب تک اسرائیلی حملے جاری ہیں ایران کسی سے بھی مذاکرات کیلئے تیار نہیں ہوگا، ایرانی وزیرخارجہ نے کہا کہ مغربی ممالک جانتے ہیں کہ اسرائیل تمام بین الاقوامی قوانین اور قراردادوں کی خلاف ورزی کررہا ہے لیکن پھر بھی مغربی ممالک ایران کے خلاف اسرائیل کی جارحیت کی مذمت نہیں کر رہے ہیں۔

عباس عراقچی کایہ بھی کہنا ہے کہ ایرانی جواب کے بعد لگتا ہے دیگر ممالک خود کو اس جارحیت سے دور رکھیں گے۔ جب تک اسرائیلی حملے جاری رہیں گے، تہران کسی فریق کے ساتھ مذاکرات کیلئے بات چیت نہیں کرے گا۔

(جاری ہے)

انہوں نے کہا کہ ایران کبھی بھی شہری آبادی خاص طور پر ہسپتال کو نشانہ نہیں بناتا لیکن اسرائیل جان بوجھ کرہسپتالوں اور رہائشی آبادیوں پر بمباری کرتا ہے۔

یاد رہے کہ گزشتہ روزایران اسرائیل کشیدگی کے خاتمے کیلئے یورپی وزرائے خارجہ نے تہران کیساتھ جوہری مذاکرات کا فیصلہ کیا تھا۔بتایاگیا تھا کہ مذاکرات کا آغاز جمعہ کو جینوا میں ہو گا۔فرانس اور برطانیہ کے وزرائے خارجہ رواں ہفتے جمعہ کو جنیوا میں ایرانی ہم منصب کے ساتھ جوہری پروگرام پر اہم مذاکرات کریں گے۔غیر ملکی خبر ایجنسی کے مطابق یورپی وزرائے خارجہ پہلے یورپی یونین کی اعلیٰ سفارتکار کایا کالاس سے جرمنی کے مستقل مشن پر ملاقات کریں گے جس کے بعد ایرانی وزیر خارجہ کے ساتھ مشترکہ اجلاس منعقد کیا جائے گا۔

خبر ایجنسی نے دعویٰ کیا تھاکہ یورپی وزرائے خارجہ نے ایران سے جوہری مذاکرات کرنے کا فیصلہ کیا ہے اور ان مذاکرات کا آغاز جمعہ کو جینوا میں ہو گاجس میں برطانیہ، فرانس اور جرمنی کے وزرائے خارجہ مذاکرات کریں گے۔خبر ایجنسی کا مزید کہنا یہ بھی کہنا تھا کہ کہ ایرانی وزیر خارجہ عباس عراقچی مذاکرات میں شریک ہوں گے۔ مذاکرات کیلئے امریکی رضا مندی شامل ہے۔

یورپی سفارتی ذرائع کا کہنا تھا کہ اگر ایران تعاون پر آمادہ ہو جائے تو خطے میں کشیدگی کم کرنے کا موقع پیدا ہو سکتا ہے ورنہ حالات بگڑنے کا اندیشہ تھا۔جرمن سفارتی ذرائع کا کہنا تھا کہ مذاکرات امریکہ کی ہم آہنگی کے ساتھ ہو رہے ہیں اور ان کا مقصد ایران سے سخت یقین دہانی حاصل کرنا ہے کہ وہ جوہری توانائی کا استعمال صرف پرامن سول مقاصدکیلئے کرے گا۔ مذاکرات کے بعد ماہرین کی سطح پر ''اسٹرکچرڈ ڈائیلاگ'' بھی ترتیب دیا گیا ہے۔یورپی سفارتی ذرائع کایہ بھی کہنا تھا کہ اگر ایران تعاون پر آمادہ ہو جائے تو خطے میں کشیدگی کم کرنے کا موقع پیدا ہو سکتا ہے ورنہ حالات بگڑنے کا اندیشہ تھا۔