انڈین میڈیا جوبولتا ہے پی ٹی آئی کا پروپیگنڈہ سیل اسی چیزکوپھیلاتا ہے‘ عظمیٰ بخاری

پروپیگنڈہ پھیلانے والے عناصر کے خلاف سخت کارروائی ہونی چاہیے‘پنجاب اسمبلی میں میڈیا سے گفتگو

جمعہ 20 جون 2025 19:01

انڈین میڈیا جوبولتا ہے پی ٹی آئی کا پروپیگنڈہ سیل اسی چیزکوپھیلاتا ..

لاہور (اُردو پوائنٹ اخبارتازہ ترین - این این آئی۔ 20 جون2025ء) صوبائی وزیر اطلاعات پنجاب عظمی بخاری نے کہا ہے کہ بھارتی میڈیا جو بیانیہ اختیار کرتا ہے، وہی ہمارے ہاں مخصوص پروپیگنڈہ سیل آگے پھیلاتے ہیں، جو قومی مفاد کے خلاف انتہائی خطرناک رجحان ہے۔ پنجاب اسمبلی میں میڈیا سے گفتگو کرتے ہوئے انہوں نے کہا کہ بغیر تصدیق کے کسی بھی خبر کو سوشل میڈیا پر پھیلانا پروپیگنڈہ کے زمرے میں آتا ہے، اور یہ رویہ نہ صرف گمراہ کن ہے بلکہ قومی سلامتی کے لیے بھی نقصان دہ ہو سکتا ہے۔

عظمی بخاری نے کہا کہ بعض عناصر سوشل میڈیا پر سنسنی پھیلانے کے بعد نہ تو معذرت کرتے ہیں اور نہ ہی اپنی پوسٹس کو مناسب وضاحت کے ساتھ ہٹاتے ہیں، جبکہ تب تک وہ خبر سادہ لوح عوام تک پہنچ چکی ہوتی ہے۔

(جاری ہے)

انہوں نے زور دیا کہ ایسے عناصر کے خلاف قانونی اور عملی سطح پر سخت کارروائی کی ضرورت ہے تاکہ مستقبل میں کوئی شخص پاکستان کے نیشنل انٹرسٹ کے خلاف ایسی مہم کا حصہ نہ بن سکے۔

انہوں نے کہا کہ سوشل میڈیا پر جھوٹی اور من گھڑت معلومات کی اشاعت سے ریاستی اداروں اور عوام کے درمیان غلط فہمیاں پیدا کرنے کی کوشش کی جاتی ہے، جو کسی صورت برداشت نہیں کی جائے گی۔ انہوں نے مطالبہ کیا کہ ان پروپیگنڈہ ٹرولز کے خلاف سخت اقدامات اٹھائے جائیں تاکہ قومی سلامتی کو کسی قسم کا خطرہ لاحق نہ ہو۔