حکومت پنجاب اورورلڈ بینک کے درمیان آئندہ 10 سالہ ترقیاتی منصوبے پر کام کی رفتار مزید تیز کرنے پر اتفاق

لاہور (اُردو پوائنٹ اخبارتازہ ترین - این این آئی۔ 20 جون2025ء)وزیر اعلیٰ پنجاب مریم نواز شریف کی ہدایت پر سینئر صوبائی وزیر مریم اورنگزیب کی زیر صدارت ورلڈ بینک کے نمائندگان کے ساتھ جاری منصوبوں پر پیش رفت کا جائزہ اجلاس منعقد ہوا۔اجلاس میں حکومت پنجاب اور ورلڈ بینک کے درمیان آئندہ 10 سالہ ترقیاتی منصوبے پر کام کی رفتار مزید تیز کرنے پر اتفاق کیا گیا۔

ورلڈ بینک کے وفد نے تعلیم، صحت، سماجی بہبود اور دیگر عوامی خدمات کے شعبوں میں حکومت پنجاب کی کارکردگی کو سراہتے ہوئے وزیر اعلیٰ مریم نواز شریف کی قیادت کی تعریف کی۔اجلاس میں تین ماہ کی کنٹری اسٹریٹجی کا جائزہ لیا گیا، جبکہ تعلیم، صحت اور سماجی بہتری کے منصوبوں میں ورلڈ بینک کی جانب سے مالی تعاون کی تجاویز پر بھی غور کیا گیا۔

(جاری ہے)

چیف سیکرٹری زاہد اختر زمان، چیئرمین پی اینڈ ڈی نبیل احمد اعوان سمیت تمام محکموں کے سیکرٹریز نے اجلاس میں شرکت کی۔

اس موقع پر ورلڈ بینک کے تعاون سے جاری منصوبوں میں پیش رفت اور درپیش مسائل کا بھی تفصیلی جائزہ لیا گیا۔اجلاس کو بتایا گیا کہ وزیر اعلیٰ مریم نواز شریف غیر ملکی سرمایہ سے جاری منصوبوں کی روزانہ کی بنیاد پر ڈیش بورڈ کے ذریعے پیش رفت کا خود جائزہ لیتی ہیں۔اجلاس میں ترقیاتی فنڈز کے شفاف استعمال اور اوورلیپنگ سے بچنے پر اتفاق رائے کیا گیا۔

پنجاب سوشل اکنامک رجسٹری ڈیٹا اور ڈیلوری سپورٹ پروگرام کو سماجی تحفظ کے لئے بنیادی حیثیت دینے پر بھی اتفاق کیا گیا۔اس موقع پر نیشنل ہیلتھ سپورٹ پروگرام، پنجاب ٹورازم فار اکنامک گروتھ اور فیملی پلاننگ پروگرام سمیت دیگر منصوبوں میں پیش رفت کا جائزہ لیا گیا۔ماحولیاتی تبدیلیوں سے نمٹنے، زراعت کے شعبے کی جدید خطوط پر استواری اور اس حوالے سے درپیش رکاوٹوں پر بھی تبادلہ خیال کیا گیا۔

فریقین نے پنجاب کے تمام دیہات میں صاف پانی کی فراہمی کے پائیدار نظام کی اہمیت پر بھی اتفاق کیا۔اجلاس میں پنجاب کے وسائل کے مؤثر استعمال، ڈیجیٹل نظام کی ترقی، اس حوالے سے درپیش رکاوٹوں اور ممکنہ حل پر بھی بات چیت ہوئی۔سینئر وزیر مریم اورنگزیب نے ورلڈ بینک کے تعاون اور سماجی بہتری کے منصوبوں میں مالی معاونت پر شکریہ ادا کیا۔ ورلڈ بینک کے وفد نے پنجاب میں وزیر اعلیٰ مریم نواز شریف کی قیادت میں گورننس، منصوبوں پر پیش رفت کی رفتار اور معیار کو سراہا۔