ایران کے خلاف امریکی طاقت کے استعمال یو این چیف کا اظہار تشویش

یو این اتوار 22 جون 2025 08:00

اسلام آباد (اُردو پوائنٹ ۔ UN اردو۔ 22 جون 2025ء) اقوام متحدہ کے سربراہ انتونیو گوتیرش نے امریکہ کی طرف سے ایران کے خلاف طاقت کے استعمال پر گہری تشویش کا اظہار کرتے ہوئے کہا ہے کہ اس تنازعہ کے قابو سے باہر ہونے کا خطرہ بڑھ گیا ہے۔

سیکرٹری جنرل کے دفتر کی طرف سے جاری کیے گئے بیان میں کہا گیا ہے کہ ہفتہ کو ایران کے خلاف امریکہ کی طرف سے طاقت کے استعمال سے خطے میں پہلے سے جاری تناؤ میں خطرناک اضافہ ہوا ہے جو عالمی امن اور سلامتی کے لیے براہ راست خطرہ ہے۔

(جاری ہے)

ان کا کہنا ہے کہ اگر یہ تنازعہ قابو سے باہر ہوتا ہے تو شہریوں، خطے اور دنیا کے لیے تباہ کن نتائج کا حامل ہو سکتا ہے۔

انہوں نے رکن ممالک سے کہا ہے کہ وہ کشیدگی کم کرنے کے لیے اقوام متحدہ کے چارٹر اور بین الاقوامی قوانین کے تحت اپنی ذمہ داریاں پوری کریں۔

اقوام متحدہ کے سربراہ نے کہا ہے کہ اس خطرناک گھڑی میں مزید تباہی سے بچنا چاہیے ۔ انہوں نے زور دے کر کہا کہ مسئلے کا کوئی فوجی حل نہیں اور آگے بڑھنے کا واحد راستہ سفارت کاری اور واحد امید امن ہے۔