راولپنڈی میں امن و امان کیلئے پولیس و انتظامیہ کا کردار انتہائی اہمیت کا حامل ہے ، کمشنر و آرپی او کا اجلاس میں خطاب

راولپنڈی (اُردو پوائنٹ اخبارتازہ ترین - اے پی پی۔ 23 جون2025ء) کمشنر راولپنڈی ڈویژن انجینئر عامرخٹک نے آر پی او بابر سرفراز الپا کے ہمراہ محرم الحرام انتظامات کے حوالے سےجائزہ اجلاس کی صدارت کی۔اجلاس کا مقصد اس بات کو باور کروانا ہے کہ انتظامیہ کی امن و امان کے لئے کی جانے والی کاوشوں میں ان کا کردار سب سے اہم ہے۔ انہوں نے انتظامی افسران کو ہدایت کی کہ شرکاء کی طرف سے مجالس اور جلوس کے لئے دی گئی آراء کا خصوصی خیال رکھا جائے۔

انجینئر عامر خٹک نے کہا کہ منتظمین مجالس و جلوس کو آن بورڈ لیتے ہوئے سیکورٹی و دیگر انتظامات مکمل کئے جائیں۔ تمام ڈپٹی کمشنرز انتظامات کی خود نگرانی کریں اور پچھلے سال کے تجربے کو مدنظر رکھتے ہوئے جو بھی کمی ہو اسے فوری دور کیا جا سکے۔

(جاری ہے)

انہوں نے کہا کہ تمام اضلاع میں کنٹرول روم قائم و فعال کئے جائیں۔ کنٹرول روم میں ہر محکمے کی جانب سے نامزد فوکل پرسنز کی حاضری کی ذمہ داری محکمے کے سربراہ پر ہو گی۔

انہوں نے ہدایت کی کہ سرکاری ہسپتالوں کے ساتھ ساتھ پرائیویٹ ہسپتالوں کو بھی الرٹ اور پرائیویٹ ایمبولنس کو سٹینڈبائی رکھا جائے۔محرم الحرام انتظامات کے لئے منعقدہ اس جائزہ اجلاس میں مجالس و جلوس منتظمین کے علاوہ ڈپٹی کمشنر راولپنڈی حسن وقار چیمہ، سی پی او سید خالد ہمدانی، ایڈیشنل کمشنر کوارڈینیشن سید نذارت علی، ڈائریکٹر جنرل پی ایچ اے و دیگر متعلقہ محکموں کے سربراہان کے علاوہ ڈپٹی کمشنر جہلم،اٹک،چکوال اور مری نے ویڈیو لنک کے ذریعے شرکت کی۔

کمشنر راولپنڈی نے مزید کہا کہ وزیر اعلی کی خصوصی ہدایت پر جلوس روٹس پر حکومت کی جانب سے سبیلیں بھی لگائی جائیں گی جو کہ اس موسمی شدت میں انتہائی سود مند ہو گی۔ انہوں نے ہدایت کی کہ روٹس کے راستے میں آنے والی بجلی و دیگر تاروں کو فوری درست کیا جائے اور پیچ ورک کا کام بھی جلد از جلد مکمل کریں۔ جلوس روٹ پر ڈینگی سپرے کروا لیا جائے۔ اسکے علاوہ روٹس کی صفائی کے لئے سالڈ ویسٹ مینجمنٹ پہلے ہی فعال کر دیا گیا ہے۔

کمشنر نے ہدایت کی کہ ہر جلوس کے ساتھ سول ڈیفنس، میونسپل کارپوریشن، واپڈا، ریسکیو و دیگر متعلقہ اہلکارساتھ رہیں گے۔ اہل تشیع علماء نے کہا کہ جلوس و مجالس کی سکیورٹی و دیگر انتظامات کے لئے ضلع انتظامیہ کی کاوشیں قابل تحسین ہیں۔ اس بار قبل از وقت تمام انتظامات کیے جا رہے ہیں تاکہ اگر کسی تصحیح کی گنجائش ہو تو فوری کی جا سکے۔