وزیراعظم کی سفارش پر صدرِ مملکت نے انسانی ہمدردی اور آئینی تقاضوں کی بنیاد پر عبدالباسط کی سزائے موت معاف کر دی، جیل سے رہا

بدھ 1 اکتوبر 2025 20:00

اسلام آباد(اُردو پوائنٹ اخبارتازہ ترین - این این آئی۔ 01 اکتوبر2025ء)وزیرِ اعظم پاکستان میاں محمد شہباز شریف کی سفارش پر صدرِ مملکت نے انسانی ہمدردی اور آئینی تقاضوں کی بنیاد پر عبدالباسط کی سزائے موت معاف کر دی،وزیرِ اعظم کی قیادت اور ان کی انصاف و انسانی ہمدردی سے وابستگی اس فیصلے کو یقینی بنانے میں بنیادی حیثیت رکھتی ہے۔ وفاقی وزیر برائے قانون، انصاف و انسانی حقوق سینیٹر اعظم نذیر تارڑ بھی اس عمل میں مسلسل سرگرم رہے جبکہ وزارتِ انسانی حقوق نے پنجاب پریزن ڈیپارٹمنٹ کے ساتھ قریبی رابطہ رکھتے ہوئے معاملے کو پاییہ تکمیل تک پہنچایا۔

عبدالباسط جو کہ ایک معذور (پیرالیجک) قیدی تھے، صدرِ مملکت کی جانب سے آئین کے آرٹیکل 45 کے تحت دی گئی معافی کے بعد فیصل آباد سینٹرل جیل سے رہا کر دیے گئے۔

(جاری ہے)

ان کی معذوری اور طویل عرصہ سزائے موت کے قیدیوں کی کوٹھڑی میں قید رہنے کے باعث یہ معاملہ بارہا انسانی ہمدردی کے تناظر میں اجاگر کیا گیا تھا۔وزیرِ اعظم اور وفاقی وزیر برائے انسانی حقوق کی ہدایات کی روشنی میں پارلیمانی سیکرٹری برائے انسانی حقوق محترمہ صبا صدیق عبدالباسط کی رہائی کے موقع پر فیصل آباد سینٹرل جیل پہنچیں۔

اس موقع پر انہوں نے کہا کہ وہ وزیرِ اعظم اور وفاقی وزیر برائے انسانی حقوق کی خصوصی ہدایت پر عبدالباسط سے ملاقات کے لیے آئی ہیں۔ انہوں نے مقتول کے ورثاء کے ساتھ ہمدردی کا اظہار کرتے ہوئے کہا کہ اگرچہ کوئی اقدام ان کے دکھ کو کم نہیں کر سکتا، تاہم یہ فیصلہ انصاف اور انسانیت کے ان اصولوں کی عکاسی کرتا ہے جن کے فروغ اور تحفظ کی ریاست پابند ہے۔