سرگودھا کارڈیالوجی سینٹر نے ایک سال میں کام شروع کردیا، لگتا ہے جنات بنا گئے‘ مریم نواز

بدھ 1 اکتوبر 2025 17:30

مری (اُردو پوائنٹ اخبارتازہ ترین - آن لائن۔ 01 اکتوبر2025ء)وزیراعلیٰ پنجاب مریم نواز نے کہا ہے کہ سیاست خدمت کا دوسرا نام ہے، سرگودھا کارڈیالوجی سینٹر نے ایک سال میں کام شروع کردیا، لگتا ہے جنات بنا گئے۔مری میں تقریب سے خطاب میں انہوں نے کہا کہ سیاست مشکل سفر اور کٹھن راستوں کا نام ہے، کم عرصے میں نواز شریف کارڈیالوجی سینٹر تعمیر کیا، مری میرا گھر ہے، بچپن سے یہاں آرہی ہوں، اہلیان مری نواز شریف کے چاہنے والے ہیں، مری کے ساتھ رشتہ لفظوں میں بیان نہیں کرسکتی۔

ان کا کہنا تھا کہ آج نواز شریف کارڈیالوجی سینٹر نے کام شروع کردیا ہے، پانچ لوگوں کی انجیو گرافی ہوئی ہے، میں ان سے مل کر آئی ہوں، 1930 کے بعد پہلی بار ساملی اسپتال کی اپ گریڈیشن ہوئی ہے، چند دنوں میں کارڈیک سرجری بھی شروع کردیں گے۔

(جاری ہے)

مریم نواز نے کہا کہ ڈسٹرکٹ مری تھا لیکن کام کرنے والے افسران پنڈی کے تھے، مری ڈسٹرکٹ بن گیا تھا مگر اسے پنڈی سے چلایا جاتا تھا، مری کا پولیس، ہیلتھ، ایجوکیشن ڈیپارٹمنٹ اب الگ ہے، مری کے اسکولوں کی اپ گریڈیشن ہو رہی ہے، مری میں پانی کا بہت بڑا پروجیکٹ لے کر آرہے ہیں، مری کی سینیٹیشن کے لیے بہترین اسکیم لے کر آرہے ہیں، مری کے لیے ٹورازم فورس بنادی ہے، مری دنیا کا بہترین سیاحتی مقام ہوگا۔

وزیراعلیٰ پنجاب کا کہنا تھا کہ مری ایکسپریس وے بنائی جہاں سے لاکھوں لوگ جاتے ہیں، مری کے لیے ستھرا پنجاب گلی محلے کی صفائی کر رہا ہے، خیبرپختونخوا سے مری میں داخل ہوتے ہی واضح فرق نظر آتا ہے، مری کارڈیک سینٹر سے گلیات کے لوگ بھی مستفید ہوں گے، بھوربن میں بھی جدید سہولتوں سے آراستہ اسپتال بنائیں گے، انتظامیہ کو ہدایت کی ہے کہ ساملی اسپتال کے لیے 3 بسیں چلائیں، مری کے لیے 15 بسوں کا آرڈر کردیا ہے، طلبا، بزرگوں، خواتین کے لیے گرین لائن بس مفت ہوگی، مری کے لیے ٹرین چلائیں گے، سیاحوں کو اپنی گاڑیوں میں نہیں آنا پڑے گا۔

انہوں نے کہا کہ خالی اعلانات کرنا بہت آسان ہے، بہت لوگوں نے خالی اعلانات کیے، جھوٹے وعدے کئے، ہم نے وعدے بھی نبھائے جو کیے نہیں تھے، کوٹلی ستیاں میں 100 بیڈ پر مشتمل اسپتال بننے جارہا ہے، بھوربن میں بھی جدید سہولتوں سے آراستہ اسپتال بنائیں گے، مری میں کلینک آن وہیل بھی کام کررہا ہے۔