فلم ’’ماں‘‘ 27 جون کو ریلیز ہورہی ہے، جسے وشال نے ڈائریکٹ کیا

اداکارہ کاجول نے راموجی فلم سٹی کو فیملیز اور بچوں کیلئے مکمل طور محفوظ قرار دیدیا

منگل 24 جون 2025 13:06

فلم ’’ماں‘‘ 27 جون کو ریلیز ہورہی ہے، جسے وشال نے ڈائریکٹ کیا

ممبئی (اُردو پوائنٹ اخبارتازہ ترین - این این آئی۔ 24 جون2025ء)بھارتی اداکارہ کاجول نے راموجی فلم سٹی کو فیملیز اور بچوں کیلئے مکمل طور محفوظ قرار دیا ہے۔اداکارہ نے اپنی پرانی بات سے یوٹرن لے لیا، جس میں انہوں نے راموجی فلم سٹی کو آسیب زدہ جگہ کہہ دیا تھا۔کاجول ان دنوں اپنی ہارر فلم’’ ماں‘‘ کی تشہیر میں مصروف ہیں، ان کا حیدر آباد میں واقع راموجی فلم سٹی سے متعلق بیان پر سوشل میڈیا صارفین نے تنقید کی اور ناگواری کا اظہار کیا۔

اس پر کاجول نے نیا بیان دیا اور لکھا کہ میں نے اپنی فلم’’ ماں‘‘ کے پروموشن کے دوران راموجی فلم سٹی کے بارے میں رائے دی، اسے مزید واضح کرنا چاہتی ہوں۔انہوں نے مزید کہا کہ میں نے راموجی فلم سٹی میں کئی پروجیکٹس کی شوٹنگ کی اور وہاں کئی مرتبہ قیام کیا، مجھے ہمیشہ وہاں فلم سازی کا ماحول نہایت پیشہ وارانہ لگا، بہت سے سیاحوں کو بخوشی وقت گزارتے دیکھا، اس لیے کہتی ہوں یہ مقام فیملیز اور بچوں کیلئے مکمل طور پر محفوظ ہے۔

(جاری ہے)

اس سے قبل ایک انٹرویو میں کاجول سے پوچھا گیا کہ کیا انہوں نے کبھی منفی انرجی محسوس کی تو اداکارہ نے جواب دیا ،ہاں کئی بار، آپ اسے منفی انرجی کہیں یا وائبز، بعض جگہوں پر آپ کو محسوس ہوتا ہے کچھ ٹھیک نہیں، میں ان جگہوں پر پوری رات سو نہیں سکی، وہاں سے جلد نکل جانا ہی بہتر سمجھا، ایسی ہی ایک مثال راموجی فلم سٹی حیدر آباد ہے، البتہ خوش قسمتی سے مجھے وہاں کوئی بھوت نظر نہیں آیا۔فلم ’’ماں‘‘ 27 جون کو ریلیز ہورہی ہے، جسے وشال نے ڈائریکٹ کیا ،جس کے پروڈیوسرز میں کاجل کے شوہر اجے دیوگن بھی شامل ہیں۔