فیفا عالمی کلب فٹ بال ٹورنامنٹ میں ( کل ) مزید چارمیچوں کا فیصلہ ہوگا

منگل 24 جون 2025 16:41

میامی(اُردو پوائنٹ اخبارتازہ ترین - این این آئی۔ 24 جون2025ء)فٹ بال کی عالمی تنظیم فیفا کے زیر اہتمام امریکا میں جاری کلب ورلڈ کپ ٹورنامنٹ میں (کل)بدھ کو مزید چار میچ کھیلے جائیں گے۔دو میچز گروپ ای اور دو میچز گروپ ایف سے کھیلے جائیں گے،گروپ ای کا پہلا میچ انٹرمیلان کلب اور ریور پلیٹ کلب کی ٹیموں کے درمیان لیمن فیلڈ، سیٹل کے مقام پر کھیلا جائے گا جبکہ گروپ ای کا دوسرا میچ جاپان کے ارووا ریڈ ڈائمنڈز کلب اور میکسیکو کے مونٹیری کلب کی ٹیموں کے درمیان روز باؤل، پاساڈینا میں کھیلا جائے گا۔

اسی طرح گروپ ایف کا پہلا میچ جرمنی کے بورسیا ڈورٹمنڈ کلب اور جنوبی کوریا کے السان ایچ ڈی کلب کی ٹیموں کے درمیان ٹی کیو ایل سٹیڈیم، سنسناٹی میں کھیلا جائے گا جبکہ گروپ ایف کا دوسرا میچ جنوبی افریقا کے ممیلودی سن ڈائونز کلب اور برازیل کے فلومینینس کلب کی ٹیموں کے درمیان ہارڈ راک سٹیڈیم، میامی گارڈنز کے مقام پر کھیلا جائے گا۔

(جاری ہے)

میگا ایونٹ کے تمام میچز امریکا کے 11 مختلف مقامات پر کھیلے جائیں گے جن میں پاساڈینا،ایسٹ ردرفورڈ،شارلٹ،اٹلانٹا فلاڈیلفیا،سیاٹل ،میامی گارڈنز،اورلینڈو،نیش ول،سنسناٹی اورواشنگٹن ڈی سی شامل ہیں۔

14جون سے شروع ہونے والا کلب فٹ بال ورلڈ کپ کا 21 واں ایڈیشن 13جولائی کو ایسٹ ردرفورڈمیں کھیلے جانے والے فائنل میچ کے ساتھ اختتام پذیر ہو گا۔فیفا کلب ورلڈ کپ میں 32 کلب ٹیمیں ٹائٹل کے حصول کیلئے پنجہ آزماہیں۔ انگلینڈ کی کلب ٹیم مانچسٹر سٹی میگا ایونٹ میں ٹائٹل کا دفاع کے لئے کوشاں ہے۔ انگلینڈ کی کلب ٹیم مانچسٹر سٹی نے 2023 کے میگا ایونٹ کے فائنل میچ میں حریف برازیل کی کلب ٹیم فلومیننس کو یکطرفہ مقابلے کے بعد 0-4گول سے شکست د ے کر ورلڈ چیمپئن ہونے کا اعزاز حاصل کیا تھا۔

فیفاکلب ورلڈ کپ کی تاریخ میں سپین کی کلب ٹیم ریال میڈرڈ کو سب سے زیادہ پانچ مرتبہ ٹائٹل جیتنے کا اعزاز حاصل ہے۔میگا ایونٹ کاپری کوارٹر فائنل رائونڈ 28جون سے یکم جولائی تک کھیلا جائے گا جس کے بعد کوارٹر فائنلز 4 اور 5 جولائی کو کھیلے جائیں گے ، اس کے بعد میگا ایونٹ کا پہلا سیمی فائنل 8جولائی جبکہ دوسرا سیمی فائنل میچ 9 جولائی کو کھیلا جائے گا۔فیفاکلب ورلڈ کپ 2026 کا فائنل میچ 13جولائی کو میٹ لائف سٹیڈیم، ایسٹ رودر فورڈ میں کھیلا جائے گا۔