سنگجانی ٹول پلازہ کے قریب موٹر وے اہلکار پر تشدد کرنے والے چار ڈمپر ڈرائیورز گرفتار، مقدمہ درج کر لیا گیا

منگل 24 جون 2025 21:30

اسلام آباد (اُردو پوائنٹ اخبارتازہ ترین - اے پی پی۔ 24 جون2025ء) موٹروے اور ضلع پولیس نے جی ٹی روڈ سنگجانی ٹول پلازہ کے قریب موٹر وے اہلکار پر تشدد کرنے والے چار ڈمپر ڈرائیورز کے خلاف مقدمہ درج کر کے انہیں گرفتار کر لیا۔

(جاری ہے)

منگل کو ترجمان نیشنل ہائی ویز اینڈ موٹروے پولیس سے جاری بیان کے مطابق جی ٹی روڈ سنگجانی ٹول پلازہ کے قریب موٹر وے اہلکار پر تشدد کی کوشش ڈمپر ڈرائیوروں کی جانب سے کی گئی ۔

واقعہ اس وقت پیش آیا جب موٹروے پولیس اہلکار اوور لوڈنگ کرنے پر قانونی کارروائی میں مصروف تھا۔اس دوران 15 سے 20 ڈمپر ڈرائیورز نے موٹروے پولیس اہلکار پر ہلہ بول دیا۔واقعہ کی اطلاع پاتے ہی موٹروے پولیس اور ضلع پولیس کی بھاری نفری موقع پر پہنچ گئی اور واقعہ میں ملوث چار ڈمپر ڈرائیورز کے خلاف مقدمہ درج کر کے انہیں گرفتار کر لیا گیا ۔مزید قانونی کارروائی جاری ہے ۔