حکومت آزادکشمیر جعلی سٹیٹ سبجیکٹ کے حامل شخص کو تحفظ دینے کی ناکام کوشش کررہی ہے ،محمد فاروق حیدر

بدھ 25 جون 2025 18:49

مظفرآباد (اُردو پوائنٹ اخبارتازہ ترین - این این آئی۔ 25 جون2025ء)سابق وزیراعظم آزادکشمیر راجہ محمد فاروق حیدر خان نے کہا ہے کہ حکومت آزادکشمیر ایک جعلی اسٹیٹ سبجیکٹ کے حامل شخص کو تحفظ دینے کی ناکام کوشش کررہی ہے کابینہ کسی غیر ریاستی کو ریاستی شہری نہیں بنا سکتی، اس حوالے سے تمام آئینی قانونی فورمز پر اس کے خلاف چارہ جوئی کرینگے ۔

سید شوکت شاہ کے ساتھ روا دکھا جانے والا سلوک قابل مذمت ایوان کی عزت و تکریم قائم رکھنا سپیکر کی ذمہ داری ہے ،مہاجرین کے خلاف نہیں لیکن ان کا نام استعمال کرکہ جعلسازی کرنے والوں کا راستہ روکیں گے ،آزادکشمیر میں برادریوں کی اجارہ داری ہے چھوٹی برادریوں سے تعلق رکھنے والوں کو کوئی پوچھتا تک نہیں کیا ان کا جینے کا حق نہیں یہ رویہ بدلنا ہوگا طاقتور کے لیے الگ اور کمزور کے لیے الگ قانون نہیں ہونا چاہیے ۔

(جاری ہے)

قانون ساز اسمبلی سیکرٹریٹ میں آزادکشمیر بھر سے آئے وفود سے بات چیت کرتے ہوئے راجہ محمد فاروق حیدر خان نے کہا کہ این ٹی ایس میرٹ لسٹ میں انتظاریہ فہرست میں موجودہ امیدواران کی اگلے امتحان تک خالی آسامیوں پر عارضی تقرریوں کے بجائے مستقل تقرریاں کی جائیں یہ امر افسوسناک ہے کہ پاس کرنے والوں کی قطعی عارضی تقرریاں کی جارہی ہیں ۔

انہوں نے مقابلے کا امتحان پاس کیا ہے ان کی مستقل بنیادوں پر تقرریاں ہونی چاہیں حکومت کی نا کوئی سمت ہے نا ہی پالیسی جس کی وجہ سے مسائل پیدا ہورہے ہیں ۔ایک سوال کے جواب میں راجہ محمد فاروق حیدر خان نے کہا کہ آزادکشمیر کے منتخب ایوان کے اندر جب عوامی مسائل پر بات نہیں ہوگی تو لوگوں میں احساس محرومی بڑھے گا قانون ساز اسمبلی کی کاروائی براہ راست مقامی کیبل آپریٹرز اور سوشل میڈیا کے اوپر نشر ہونی چاہئے تاکہ لوگوں کو پتہ چلے کہ ان کے منتخب نمائندے ایوان میں ان کی ترجمانی کیسے کرتے ہیں۔