جدید ٹیکنالوجی ٹریفک سیفٹی نظام کو کامیاب بنا سکتی ہے ،حادثات میں کمی کیلئے جامع حکمت عملی بنا نا ہوگی ،گورنر بلوچستان

جمعرات 26 جون 2025 00:30

کوئٹہ (اُردو پوائنٹ اخبارتازہ ترین - اے پی پی۔ 26 جون2025ء) گورنر بلوچستان جعفرخان مندوخیل نے کہا کہ حکومت ٹریفک قوانین کی تشکیل اور انکے نفاذ میں کلیدی کردار ادا کرتی ہے شہریوں کوقوانین سے آگاہی دینے کے ساتھ ساتھ ٹریفک قوانین پر سختی سے عملدرآمد کرانا ضروری ہے،اس ضمن میں جدید ٹیکنالوجی سے بھرپور استفادہ ہی پورے ٹریفک مانیٹرنگ سسٹم، وہیکل فٹنیس، سڑک کی حفاظت اور ٹریفک سیفٹی نظام کو کامیاب بنا سکتی ہے ۔

(جاری ہے)

قومی شاہراہوں پر ٹریفک حادثات میں کمی لانے کیلئے ہمیں فوری طور پر ایک جامع حکمت عملی بنا نا ہوگی، ان خیالات کا اظہار انہوں نے گورنر ہاؤس کوئٹہ میں ڈی آئی جی موٹروے (ویسٹ زون) اشفاق احمد خان کی جانب سے بریفنگ دیتے ہوئے کیا۔ اس موقع پر ڈی آئی جی موٹروے کے عملہ سمیت پرنسپل سیکرٹری ٹو گورنر بلوچستان ہاشم خان غلزئی بھی موجود تھے۔ گورنربلوچستان جعفرخان مندوخیل نے ڈرائیونگ لائسنس، گاڑی فٹنس اور تعلیمی اداروں میں ٹریفک قوانین کے بارے میں پبلک سیکٹر یونیورسٹیز میں آگاہی سیشن منعقد کرنے کی اہمیت پر زور دیا ، جس سے نوجوان نسل میں روڈ سیفٹی کا احساس اجاگر کرنے میں فکری رہنمائی ملے گی۔