انگلینڈ کو دوسرے ٹیسٹ میچ میں شکست دیکر سیریز میں جاندار کم بیک کریں گے، ریشبھ پنت

جمعرات 26 جون 2025 12:16

لندن (اُردو پوائنٹ اخبارتازہ ترین - اے پی پی۔ 26 جون2025ء) بھارت کی مردوں کی کرکٹ ٹیم کے مایہ ناز وکٹ کیپر بلے باز ریشبھ پنت نے کہا ہے کہ انگلینڈ ٹیم کے ہاتھوں ابتدائی ٹیسٹ میچ میں شکست کے باوجود ٹیم کے حوصلے پست نہیں ہوئے، انہوں نے کہا کہ میزبان ٹیم کو دوسرے میچ میں شکست دیکر پانچ ٹیسٹ میچوں کی سیریز میں جاندار کم بیک کرینگے، 27 سالہ ریشبھ پنت نے کہا کہ ان کی ٹیم نے انگلینڈ ٹیم کے خلاف دوسرے ٹیسٹ میچ کے لئے حکمت عملی تیار کر رکھی ہے اور بھرپور تیاریوں میں مصروف ہے۔

انہوں نے کہا کہ میزبان ٹیم نے پہلے ٹیسٹ میں اچھا کھیل پیش کرتے ہوئے کامیابی حاصل کی ۔ وکٹ کیپر بلے باز نے کہا کہ وہ برطانوی ٹیم کے خلاف پہلے کی طرح دوسرے ٹیسٹ میچ میں بھی شاندار کارکردگی کا مظاہرہ کرتے ہوئے اپنی ٹیم کے سیریز میں کم بیک کے لئے اہم کردار ادا کریں گے۔

(جاری ہے)

اپنے ایک بیان میں ریشبھ پنت نے کہا کہ وہ مکمل طور پر فٹ ہیں اور انگلینڈ کے خلاف سیریز کے دوسرے میچ میں شرکت کے لئے بے تاب ہیں۔

ریشبھ پنت نے انگلینڈ کے خلاف لیڈز میں کھیلے گئے پہلے ٹیسٹ میچ کی دونوں اننگزمیں سنچریاں سکور کی تھی۔ایک سوال کے جواب میں پنت نے کہا کہ پانچ میچوں کی سیریز کے پہلے میچ میں میزبان ٹیم کے ہاتھوں شکست کے باوجود ٹیم کے حوصلے پست نہیں ہوئے، دوسرے میچ میں کامیابی حاصل کرکے سیریز میں جاندار کم بیک کریں گے ۔ انہوں نے کہا کہ بلاشبہ میزبان ٹیم کو اس کی سرزمین پر شکست دینا آسان نہیں ہے تاہم انہوں نے کہا کہ انگلینڈ کے خلاف سیریز میں کم بیک کرنے کے لئے ٹیم کو تینوں شعبوں میں سو فیصد کارکردگی کا مظاہرہ کرنا ہوگا۔واضح رہے کہ انگلینڈ اور بھارت کی ٹیموں کے درمیان دوسرا ٹیسٹ میچ 2 سے 6 جولائی تک ایجبسٹن،برمنگھم میں کھیلا جائے گا۔\932