سعودی فٹ بال کلب النصر کی پرتگال کے شہرہ آفاق فٹ بالر کرسٹیانو رونالڈو کے ساتھ معاہدے میں دو سالہ تجدید

جمعہ 27 جون 2025 10:30

ریاض (اُردو پوائنٹ اخبارتازہ ترین - اے پی پی۔ 27 جون2025ء) پرتگال کے بین الاقوامی شہرت یافتہ فٹ بالر کرسٹیانو رونالڈو اور سعودی عرب کے معروف کلب النصر کے درمیان معاہدے میں دو سال کی توسیع ہوگئی ہے جس کے تحت اب کرسٹیانو رونالڈو مزید آئندہ دوسال تک النصر کی نمائندگی کریں گے۔فرانسیسی خبر رساں ایجنسی اے ایف پی کے مطابق سعودی پرو لیگ نے اعلان ہے کہ معروف فٹ بالر کرسٹیانو رونالڈو نے النصر کلب کے ساتھ توسیعی معاہدے پر دستخط کر دیے ہیں۔

اس طرح پرتگال سے تعلق رکھنے والے فارورڈ نے اپنی 42 ویں سالگرہ سے پہلے النصر کے ساتھ ہی اپنا سفر مزید دو سال جاری رکھنے کا فیصلہ کیا ہے۔سعودی کلب کی جانب سے سوشل میڈیا ایکس پر لکھا گیا کہ کرسٹیانو رونالڈو 2027 تک النصر کلب کے ساتھ منسلک رہیں گے۔

(جاری ہے)

اس سے قبل گذشتہ برس النصر کلب نے بھی کرسٹیانو رونالڈو کے ساتھ اپنے معاہدے میں توسیع کی خواہش ظاہر کی تھی۔

رواں برس جنوری میں رونالڈو نے روشن پروفیشنل لیگ ویب کو انٹرویو میں سعودی عرب میں اپنی آمد کو اپنے لیے باعثِ اعزاز قرار دیا تھا، سعودی لیگ میں شامل ہونے والے سٹارز میں وہ سرِفہرست ہیں۔کرسٹیانو رونالڈو نے سعودی عرب میں اپنے قیام پر اطمینان کا اظہار کرتے ہوئے کہا تھا کہ میں خوش ہوں، میرا خاندان خوش ہے، ہم نے اس خوب صورت ملک میں ایک نئی زندگی کا آغاز کیا۔

النصر کلب کے ساتھ یادگار لمحات کے سوال پر سٹار فٹ بالر کا کہنا تھا کہ 2023 میں الہلال کے ساتھ شاہ سلمان کپ کے لیے کھیلا گیا پہلا فائنل انتہائی دلچسپ اور پُرجوش تھا۔واضح رہے کہ کرسٹیانو رونالڈو نے 2022 میں برطانوی کلب مانچسٹر یونائیٹڈ کو چھوڑ کر ریاض کے النصر کلب میں شمولیت اختیار کی تھی۔وہ النصر کلب کی جانب سے اب تک 105 میچوں میں ریکارڈ 93 گول کر چکے ہیں۔\932