Live Updates

تھانہ روات کے علاقہ میں رات گئے پولیس اور کرائم کنٹرول ڈیپارٹمنٹ کی مشترکہ کارروائی کے دوران فائرنگ ،کار سنیچر ہلاک

ہفتہ 28 جون 2025 15:08

راولپنڈی (اُردو پوائنٹ اخبارتازہ ترین - اے پی پی۔ 28 جون2025ء) راولپنڈی کے تھانہ روات کے علاقہ میں رات گئے پولیس اور کرائم کنٹرول ڈیپارٹمنٹ کی مشترکہ کارروائی کے دوران فائرنگ کے تبادلے میں کار سنیچر ہلاک ہو گیا جبکہ اس کے 2 ساتھی فرار ہونے میں کامیاب ہو گئے۔ ترجمان راولپنڈی پولیس کے مطابق کچھ دیر قبل فیز 8 کے علاقے سے چھینی گئی کار کو سی سی ڈی اور روات پولیس نے ناکہ بندی کے دوران روکنے کی کوشش کی۔

کار سوار تین ملزمان نے پولیس ٹیم کو دیکھتے ہی اندھا دھند فائرنگ شروع کر دی جس پر پولیس نے مؤثر جوابی کارروائی کی۔ فائرنگ کے دوران ایک گولی کانسٹیبل ثقلین فرحت کو چھاتی پر لگی تاہم بلٹ پروف جیکٹ کی وجہ سے وہ محفوظ رہے۔ پولیس کی جوابی فائرنگ سے ایک ملزم موقع پر ہی ہلاک ہو گیا جس کی شناخت آصف کے نام سے ہوئی۔

(جاری ہے)

پولیس کے مطابق آصف جڑواں شہروں میں گاڑیاں چوری، اغواء برائے تاوان اور دیگر سنگین جرائم میں ریکارڈ یافتہ تھا۔

فرار ہونے والے دو ملزمان کی گرفتاری کے لیے علاقے میں سرچ آپریشن جاری ہے۔ سی پی او سید خالد ہمدانی نے چھینی گئی کار کی برآمدگی اور بہادری سے مقابلہ کرنے پر روات پولیس ٹیم کو شاباش دیتے ہوئے کہا کہ شہریوں کی جان و مال پر حملہ کرنے والے قانون کی گرفت سے نہیں بچ سکتے۔ شہریوں کے تحفظ کے لیے جرائم پیشہ عناصر کے خلاف کارروائیاں بلا امتیاز جاری رہیں گی۔