بلوچستان کے مختلف علاقوں میں شدید زلزلہ، درجنوں مکانات تباہ، شہریوں کے زخمی ہونے کی اطلاعات

کوئٹہ ( اُردو پوائنٹ اخبارتازہ ترین۔ 29 جون 2025ء ) صوبہ بلوچستان کے مختلف علاقوں میں شدید زلزلے کے باعث درجنوں مکانات تباہ ہوگئے اور شہریوں کے زخمی ہونے کی بھی اطلاعات موصول ہوئی ہیں۔ میڈیا رپورٹس کے مطابق بلوچستان کے ضلع موسیٰ خیل اور گردونواح میں اتوار کی صبح زلزلے کے شدید جھٹکے محسوس کیے گئے جس کے نتیجے میں لوگوں میں خوف و ہراس پھیل گیا اور متعدد علاقوں میں املاک کو بھی نقصان پہنچا، ریکٹر سکیل پر زلزلے کی شدت 5.5 ریکارڈ کی گئی، اس کی گہرائی 28 کلومیٹر اور زلزلے کا مرکز موسیٰ خیل سے 56 کلومیٹر شمال مشرق میں واقع تھا۔

بتایا گیا ہے کہ زلزلے کے جھٹکوں کے بعد علاقہ مکین شدید خوف کے عالم میں گھروں سے باہر نکل آئے اور کئی گھنٹے تک کھلے میدانوں میں مقیم رہے، ضلعی انتظامیہ نے متاثرہ علاقوں میں امدادی ٹیمیں روانہ کردی گئی ہیں اور نقصانات کا مکمل تخمینہ لگانے کا عمل جاری ہے، پی ڈی ایم اے کا کہنا ہے کہ زلزلے کے نتیجے میں کم از کم 21 مکانات مکمل طور پر تباہ ہوئے، پانچ مکانات کو جزوی نقصان پہنچا، مکانات گرنے کے مختلف واقعات میں چار افراد زخمی ہوئے جنہیں فوری طور پر طبی امداد کے لیے مقامی ہسپتال منتقل کر دیا گیا۔

(جاری ہے)

معلوم ہوا ہے کہ بلوچستان کے ضلع بارکھان میں کوہِ سلیمان کے دامن سے متصل علاقوں رکھنی، چھپر، مہمہ، صمند خان اور رڑکن میں بھی زلزلے کے جھٹکے محسوس کیے گئے جس کے نتیجے میں عوام میں شدید خوف و ہراس پھیل گیا، زلزلے کے بعد شہری اپنے گھروں سے باہر نکل آئے اور کھلے میدانوں میں پناہ لی، متعدد گھروں کی دیواریں اور کمروں کی چھتیں گرنے کے علاوہ کئی مقامات پر بجلی کے کھمبوں کو بھی نقصان پہنچا جس کے باعث بعض علاقوں میں وقتی طور پر بجلی کی فراہمی معطل ہو گئی۔

بتایا جارہا ہے کہ مقامی انتظامیہ اور ریسکیو ٹیمیں متاثرہ علاقوں میں نقصانات کا جائزہ لے رہی ہیں، زلزلے سے فوری طور پر کسی جانی نقصان کی اطلاع موصول نہیں ہوئی تاہم بعض دیہی علاقوں میں نقصانات کی نوعیت جاننے کے لیے سروے کا آغاز کر دیا گیا، حکام نے شہریوں کو ممکنہ آفٹر شاکس کے خطرے کے پیش نظر احتیاطی تدابیر اختیار کرنے کی ہدایت کی ہے، پی ڈی ایم اے اور ریسکیو ادارے کی جانب سے امدادی کارروائیاں جاری ہیں۔