ڈسٹرکٹ الیکشن کمشنرراولپنڈی کی زیر صدارت ووٹر ایجوکیشن کے لئے آگاہی سیمینار

اتوار 29 جون 2025 16:50

راولپنڈی (اُردو پوائنٹ اخبارتازہ ترین - اے پی پی۔ 29 جون2025ء) الیکشن کمیشن آف پاکستان کی ہدایات کی روشنی میں طلباء/ طلبات میں ووٹ کی اہمیت اور الیکشن کمیشن آف پاکستان کے آئینی کردار کے متعلق ڈسٹرکٹ الیکشن کمشنر راولپنڈی ذیشان خان کی زیرصدارت راولپنڈی کے ایک نجی سکول میں سیمینار کا انعقاد کیا گیا جس کا مقصد انتخابی عمل کی اہمیت اور ایک اچھی حکومت سازی میں اس کا کردار اور طلباء/ طلبات کو انتحابی عمل میں شمولیت اختیار دیتے ہوئے اپنا حصہ ڈالنا تھا۔

اس موقع پر ڈسٹرکٹ الیکشن کمشنر ذیشان خان، اسسٹنٹ الیکشن کمشنر تنویر احمد اور پرنسپل سکول منظور حسین صاحب، بوائز ہیڈ وینگ جناب ارشد ابراہیم صاحب اور گرلز ہیڈ وینگ مسماۃ صبیحہ حفیظ ودیگر نے سیمینار سے خطاب کرتے ہوئے کہا کہ اکژیت کی انتخابی عمل میں شمولیت کے بغیر ملک کا ترقی یافتہ ملکوں میں شمار کرنا ممکن نہیں۔

(جاری ہے)

ووٹ کے اندراجات اور تبدیلی کے بارے میں آگاہی دی گئی اور انتخابی فہرستوں کی تیاری اور الیکشن کے دن ہونے والے تمام مراحل سے طلباء/ طلبات کو مطلع کیا گیا۔

مزید یہ کہ طلباء/ طلبات کو ڈسٹرک الیکشن کمشنر راولپنڈی ذیشان خان نے تفصیل سے آگاہ کیا کہ کیسے 18 سال کی عمر پوری ہونے پر جب کوئی شخص اپنا شناختی کارڈ بنواتاہے تو نادرا اور الیکشن کمیشن آف پاکستان کی جانب سے خودکار نظام کے تحت ووٹ کا اندراج ہوجاتا ہے اورمزید یہ کہ کوئی ووٹراپنا ووٹ موجود ووٹر لسٹوں میں کیسے چیک کرسکتا ہے یا کسی غلطی کی صورت میں کیسے صحیح کرواسکتا ہے۔

اس موقع پراس بات پر بھی روشنی ڈالی گئی کہ انتخاب کے عمل میں شمولیت کو یقینی بنا کر ووٹر اپنے ووٹ کا استعمال کریں اور اچھے شہری ہونے کا ثبوت دیں۔ طلباء/ طلبات اپنے ووٹ کی طاقت کو پہچانیں اورکسی مخصوص فرد کے بجائے ایسے امیدواروں کا انتخاب کریں جو معاشرتی اورقومی بہتری کے لئے کام کرتے ہوں اس کے علاوہ شرکاء نے طلباء/ طلبات کو انتخابی عمل میں فعال طور پر حصہ لینے کی ترغیب دی۔ اختتام پر طلباء/ طلبات کے مختلف سوالات کا مختصر اور جامع جوابات دیئے گئے اور اس سیمینار میں بھرپور شرکت پر سکول پرنسپل، سٹاف اور طلبا کا شکریہ ادا کیا گیا۔ اور آئندہ بھی ایسے آگاہی سیمینارمنعقد کرنے کیلئے اپنی خواہش کا اظہار کیا۔\378