وزیراعظم نے اسلام آباد کو پائلٹ اسمارٹ سٹی بنانے کی ہدایت دی ہے ، شزہ فاطمہ

ٹیلی میڈیسن کے ذریعے تمام بی ایچ یوز میں انٹرنیٹ پہنچایا جائے گا، آن لائن ماہرین سے مشاورت کی سہولت ہر جگہ فراہم کریں گے، وفاقی وزیر

پیر 30 جون 2025 15:20

اسلام آباد (اُردو پوائنٹ اخبارتازہ ترین - این این آئی۔ 30 جون2025ء)وفاقی وزیر آئی ٹی شزہ فاطمہ نے کہاہے کہ وزیراعظم نے اسلام آباد کو پائلٹ اسمارٹ سٹی بنانے کی ہدایت دی۔ جاری اعلامیہ کے مطابق شزہ فاطمہ نے کہاکہ وزارت نے اسلام آباد کے تمام پبلک اسکولز، بی ایچ یوز اور ہیلتھ سیکٹرز کو فائبر فراہم کرنے کی فنڈنگ کر دی۔ انہوںنے کہاکہ اگلے چھ سے آٹھ ماہ میں ہسپتال، اسکولز اور پولیس اسٹیشن فائبرائز ہو جائیں گے۔

وفاقی وزیر نے کہاکہ مفت عوامی وائی فائی کیلئے مخصوص مقامات کی نشاندہی کی جا رہی ہے۔ انہوںنے کہاکہ میٹرو بس اور عوامی مقامات پر وائی فائی کیلئے پبلک پرائیویٹ پارٹنرشپ سے کام ہو رہا ہے، وزارت تعلیم ہمارے ساتھ مکمل تعاون کر رہی ہے۔شزہ فاطمہ نے کہاکہ دور دراز علاقوں میں ایڈ ٹیک کے ذریعے تعلیمی سہولت فراہم کریں گے، اے آئی اور ایمرجنگ ٹیکنالوجیز کو چھٹی جماعت سے شروع کر کے کنڈرگارٹن تک لے جائیں گے۔

(جاری ہے)

شزہ فاطمہ نے کہاکہ وزیراعظم چاہتے ہیں کہ اسلام آباد کا ہر بچہ تعلیم حاصل کرے، یہی منصوبہ گلگت بلتستان اور دور دراز علاقوں تک پہنچانا ہے۔ وفاقی وزیر نے کہاکہ ٹیکنالوجی کے ذریعے ریموٹ اسکولز میں بھی تعلیم ممکن بنائیں گے، ہیلتھ منسٹر کے ساتھ مل کر ‘‘ون پیشنٹ، ون آئی ڈی’’ پر کام کر رہے ہیں۔ وفاقی وزیر آئی ٹی نے کہاکہ ٹیلی میڈیسن کے ذریعے تمام بی ایچ یوز میں انٹرنیٹ پہنچایا جائے گا، آن لائن ماہرین سے مشاورت کی سہولت ہر جگہ فراہم کریں گے۔

انہوںنے کہاکہ وزیراعظم نے نصاب میں آئی ٹی تعلیم شامل کرنے کے لیے کمیٹی قائم کی ۔ وفاقی وزیرنے کہاکہ ہدف ہے کہ پانچ لاکھ نوجوانوں کو جدید آئی ٹی اسکلز کی تربیت دی جائے ،دو لاکھ بچوں کو گوگل، تین لاکھ کو ہواوے اور دو لاکھ کو مائیکروسافٹ ٹریننگ دیگا۔وفاقی وزیر آئی ٹی نے کہاکہ بچے، بچیاں پرائمری سطح پر اے آئی سیکھ کر آگے بڑھیں گے ۔ شزہ فاطمہ نے کہاکہ ملکی آئی ٹی افرادی قوت کو عالمی معیار کے مطابق تیار کرنے کے لیے مربوط اقدامات کیے جا رہے ہیں ۔