Live Updates

93 کلومیٹر طویل سڑک پر 12 ارب روپے کی لاگت سے ترقیاتی کام جاری ہے، کمشنر ملتان

منگل 1 جولائی 2025 22:20

ملتان (اُردو پوائنٹ اخبارتازہ ترین - اے پی پی۔ 01 جولائی2025ء) کمشنر ملتان عامر کریم خاں نے زیرتعمیروہاڑی روڈ کے مختلف سیکشنز کا دورہ کیا اور تعمیراتی پیش رفت کا جائزہ لیا۔ انہوں نے ہدایت کی کہ منصوبے کی بروقت اور معیاری تکمیل کو ہر صورت یقینی بنایا جائے اور بس شیڈز سمیت تمام سہولیات کا خصوصی خیال رکھا جائے۔ملتان ڈویژن کے تین اضلاع کو آپس میں جوڑنے والی 93 کلومیٹر طویل سڑک پر 12 ارب روپے کی لاگت سے ترقیاتی کام جاری ہے۔

کمشنر نے کہا کہ وزیر اعلیٰ پنجاب مریم نواز نے ملتان ڈویژن کے عوام کا دیرینہ مطالبہ پورا کر دیا ہے۔ انہوں نے کہا کہ منصوبے پر بیک وقت تینوں اضلاع میں کام جاری ہے اور دسمبر 2026 تک سڑک کو مکمل طور پر فنکشنل کر دیا جائے گا۔ ضلع خانیوال میں واقع 6 کلومیٹر طویل حصہ دسمبر 2025 تک مکمل کیا جائے گا۔

(جاری ہے)

منصوبے میں ضلع ملتان کا 19.20 کلومیٹر، ضلع خانیوال کا 6 کلومیٹر جبکہ ضلع وہاڑی کا 49.60 کلومیٹر طویل حصہ شامل ہے۔

کمشنر ملتان نے واضح کیا کہ آبادی والے علاقوں میں سڑک کے دونوں اطراف نکاسی آب کے موثر نظام کی تنصیب یقینی بنائی جائے تاکہ بارش یا استعمال کے دوران پانی سڑک پر کھڑا نہ ہو اور اس کی پائیداری متاثر نہ ہو۔ انہوں نے کہا کہ تعمیراتی کام کے ساتھ ڈرینیج سسٹم کی مکمل فعالیت بھی ترجیحی بنیادوں پر کی جائے۔ منصوبے کی جلد تکمیل کے لیے حکومت پنجاب نے درکار فنڈز فراہم کر دیے ہیں جبکہ اضافی کیرج وے کی تعمیر پر بھی 13 ارب روپے کی لاگت سے کام جاری ہے۔

ایس ای ہائی ویز کے مطابق سروسز کی منتقلی کے لیے متعلقہ محکموں کو فنڈز منتقل کیے جا چکے ہیں جبکہ تعمیراتی عمل کے لیے ٹیکنیکل سٹاف کو متحرک کر دیا گیا ہے اور اسفالٹ پلانٹ کی تنصیب بھی مکمل ہو چکی ہے۔غلام نبی نے یقین دہانی کرائی کہ تمام مراحل مقررہ مدت میں مکمل کر لیے جائیں گے۔ اس موقع پر ایکسئن ہائی ویز حیدر علی اور دیگر متعلقہ افسران بھی موجود تھے، جنہوں نے کمشنر کو تفصیلی بریفنگ دی اور منصوبے کی رفتار اور معیار پر اطمینان کا اظہار کیا۔