جیو فلم دیمک کا عالمی اعزاز، شنگھائی فلم فیسٹیول میں شامل کرلی گئی

شنگھائی تعاون تنظیم فلم فیسٹیول 3تا 7جولائی 2025کو یونگچوان، چونگچنگ(چین)میں منعقد ہوگا

بدھ 2 جولائی 2025 12:24

جیو فلم دیمک کا عالمی اعزاز، شنگھائی فلم فیسٹیول میں شامل کرلی گئی

بیجنگ (اُردو پوائنٹ اخبارتازہ ترین - این این آئی۔ 02 جولائی2025ء)پاکستانی سینما کی مشہور و معروف ہارر فلم دیمککو ایک بڑے اعزاز سے نوازا گیا ہے اور فلم کو شنگھائی تعاون تنظیم (SCO)فلم فیسٹیول 2025 میں باضابطہ طور پر مدعو کرلیا گیا۔شنگھائی تعاون تنظیم (SCO)فلم فیسٹیول 3تا 7جولائی 2025 کو یونگچوان، چونگچنگ(چین)میں منعقد ہوگا۔فلم فیسٹیول شنگھائی تعاون تنظیم کے تحت چین کی میزبانی میں منعقد کیا جا رہا ہے جس کا مقصد خطے کی 10رکن ریاستوں اور 2مبصر ممالک کے درمیان ثقافتی اشتراک اور فلمی تعاون کو فروغ دینا ہے۔

جیوفلمزکے بینر تلے بنائی گئی فلم دیمککو اس فیسٹیول میں خطے کی دیگر فلموں کے ساتھ پیش کیا جائے گا جہاں فلمی نمائشوں، مقابلوں اور بین الاقوامی تعاون پر مبنی اجلاس بھی منعقد کیے جائیں گے۔

(جاری ہے)

یہ فیسٹیول چائنا فلم ایڈمنسٹریشن اور چونگچنگ میونسپل پیپلز گورنمنٹ کے اشتراک سے منعقد کیا جارہا ہے۔ فلم کے ہدایتکار رافع راشدی کو اس فیسٹیول خصوصی طور شرکت کیلئے مدعو کیا گیا ہے۔

اس موقع پر ان کا کہنا تھا کہ یہ ہمارے لیے باعثِ فخر ہے کہ فلمدیمک کو ایک عالمی پلیٹ فارم پر پاکستانی سنیماکی نمائندگی کا موقع ملاہے، جنوبی ایشیائی داستانوں اور وحشت پر مبنی کہانیوں کو جس طرح سے عالمی پذیرائی مل رہی ہے، وہ اس انتخاب کا ثبوت ہے۔مانڈوی والا انٹرٹینمنٹ کے تحت پاکستان بھر میں ریلیزکی جانیوالی فلم دیمک ملک بھر میں کامیابی کے جھنڈے گاڑھنے کے بعد اب بین الاقوامی فلمی میلوں میں بھی شاندار پذیرائی حاصل کررہی ہے۔یاد رہے کہ جیوفلمز اس سے قبل بھی کئی شاہکار فلمیں خدا کے لیے، بول، طیفا اِن ٹربل، دی لیجنڈآف مولا جٹ، ڈونکی کنگ اور دی گلاس ورکر پیش کر چکا ہے۔