پشاور،نو پارکنگ زون اور ڈبل پارکنگ میں گاڑیاں کھڑی کرنے پر 613 افراد کے چالان

بدھ 2 جولائی 2025 17:52

پشاور (اُردو پوائنٹ اخبارتازہ ترین - اے پی پی۔ 02 جولائی2025ء) سٹی ٹریفک پولیس پشاور نے سڑک کنارے نو پارکنگ زون اور ڈبل پارکنگ میں گاڑیاں کھڑی کرنے پر 613 افراد کا چالان کیا۔

(جاری ہے)

تفصیلات کے مطابق چیف ٹریفک آفیسر ہارون رشید خان کی سربراہی میں سٹی ٹریفک پولیس پشاور کی جانب سے شہر بھر میں نو پارکنگ زون میں گاڑیاں اور موٹر سائیکلیں کھڑی کرنے والوں کے خلاف سخت کارروائیاں عمل میں لائی گئیں جس کے تحت سینکڑوں گاڑیوں کو فورک لفٹر کے ذریعے اٹھا کر ٹرمینل میں بند کردیا جبکہ سینکڑوں گاڑیوں کے مالکان کو موقع پر چالان کیا گیا۔

چیف ٹریفک آفیسر ہارون رشید خان نے کہا ہے کہ شہری نو پارکنگ زونز میں گاڑیاں کھڑی کرنے سے گریز کریں کیونکہ اس اقدام سے ٹریفک جام ہوتا ہے جس سے لوگوں کو شدید مشکلات کا سامنا کرنا پڑتا ہے اور لوگوں کا قیمتی وقت ضائع ہونے سمیت اکثر اوقات رش میں ایمبولینسز پھنس جاتی ہیں جس سے مریضوں کو شدید مشکلات کا سامنا کرنا پڑتا ہے۔