سپیکر قومی اسمبلی سردار ایاز صادق کی باجوڑ میں پھاٹک میلہ کے قریب بم دھماکہ کی مذمت

بدھ 2 جولائی 2025 18:40

اسلام آباد (اُردو پوائنٹ اخبارتازہ ترین - اے پی پی۔ 02 جولائی2025ء) سپیکر قومی اسمبلی سردار ایاز صادق نے باجوڑ میں پھاٹک میلہ کے قریب ہونے والے بم دھماکے کی شدید الفاظ میں مذمت کی ہے۔ قومی اسمبلی سیکرٹریٹ میڈیا ونگ سے جاری بیان کے مطابق سردار ایاز صادق نے کہا کہ دہشت گرد حملہ نہایت بزدلانہ اور شرمناک اقدام ہے جس کا مقصد امن و امان کو سبوتاژ کرنا اور ریاستی عملداری کو کمزور کرنا ہے۔

انہوں نے اس افسوسناک واقعہ میں اسسٹنٹ کمشنر اور تحصیلدار نوا گئی سمیت دیگر سرکاری اہلکاروں کے جانی نقصان پر گہرے دکھ اور افسوس کا اظہار کیا۔ انہوں نے کہا کہ پولیس اہلکاروں اور سرکاری افسران پر حملہ ریاست پر حملے کے مترادف ہے اور ایسے بزدلانہ اقدامات قوم کے عزم و حوصلے کو کمزور نہیں کر سکتے۔

(جاری ہے)

سردار ایاز صادق نے شہداء کے اہلخانہ سے دلی تعزیت اور ہمدردی کا اظہار کرتے ہوئے کہا کہ وہ اس سانحہ میں متاثرہ خاندانوں کے غم اور دکھ میں برابر کے شریک ہیں۔

انہوں نے دھماکے کے نتیجے میں زخمی ہونے والوں کی جلد صحت یابی کے لئے دعا کی اور اس عزم کا اظہار کیا کہ ملک دشمن عناصر کے خلاف قومی یکجہتی اور عزم سے مقابلہ جاری رکھا جائے گا۔سپیکر قومی اسمبلی نے اللہ تعالیٰ سے شہداء کے درجات کی بلندی اور پسماندگان کو اس ناقابل تلافی نقصان کو برداشت کرنے کیلئے صبر جمیل عطا فرمانے کی دعا کی۔