احمد پور شرقیہ، ضلع بھر غیر قانونی گیس فلنگ سٹیشنز اور پبلک ٹرانسپورٹ میں نصب ایل پی جی سلنڈزر کے خلاف کریک ڈاؤن جاری

جمعرات 3 جولائی 2025 19:17

احمدپورشرقیہ (اُردو پوائنٹ اخبارتازہ ترین - اے پی پی۔ 03 جولائی2025ء) ضلع بھر میں غیر قانونی گیس فلنگ سٹیشنز اور پبلک ٹرانسپورٹ میں نصب ایل پی جی سلنڈرزکے خلاف کریک ڈائون جاری ہے۔ ڈپٹی کمشنربہاولپور کی ہدایت پر درجنوں غیر قانونی ری فلنگ کاروباری مراکز پر سامان کو ضبط کر کے سربمہرکردیاگیا ، ضلع بھر کے اسسٹنٹ کمشنرز، سیکرٹری آر ٹی اے،پولیس اور محکمہ سول ڈیفنس کی مشترکہ کارروائی کے تحت بہاولپور کی تمام تحصیلوں میں غیر قانونی گیس ری فلنگ کرنے والوں اور پبلک ٹرانسپورٹ میں نصب ایل پی جی سلنڈرزکے خلاف کریک ڈائون جاری ہے۔

کارروائی کے دوران گیس ری فلنگ مشینیں قبضہ میں لے کر دکانیں سیل اور ملزمان کے خلاف ایف آئی آرز کااندراج کرایا جارہا ہے تاکہ اس مذموم دھندے میں ملوث عناصر کے خلاف قانونی کارروائی عمل میں لائی جا سکے۔

(جاری ہے)

اس سلسلے میں احمدپور شرقیہ، مبارک پور، یزمان، خانقاہ شریف، لال سہانرا، خیرپورٹامیوالی، حاصل پوراوربہاولپور شہر میں غیر قانونی متعدد ری فلنگ سٹیشنزکو سربمہر کیا گیا ہے اور ان پراستعمال ہونے والے آلات کوبھی قبضہ میں لیا گیا ہے۔

ڈپٹی کمشنربہاولپور ڈاکٹر فرحان فاروق نے گزشتہ روز ایک اجلاس میں ایل پی جی کی غیرقانونی ڈیکینٹنگ کے خلاف زیروٹالرنس پالیسی اختیار کرنے کے احکامات جاری کیے تھے جس کے تحت غیرقانونی ریفلنگ سٹیشنز اور ڈھابوں کیخلاف کارروائی شروع کی گئی ہے اور درجنوں غیر قانونی ایل پی جی گیس کی ری فلنگ کے کاروباری مراکز پر سامان کو ضبط کر کے سربمہرکیا گیا ہے۔

ڈپٹی کمشنر نے کہا کہ عوام کے جان و مال کو خطرے میں ڈالنے والی سرگرمیوں کے خلاف زیرو ٹالرنس پالیسی پر عمل درآمد جاری رہے گا، غیر قانونی عمل میں ملوث افراد کسی رعایت کے مستحق نہیں۔ انہوں نے عوام الناس سے اپیل ہے کہ کسی بھی مشکوک یا غیر قانونی سرگرمی کی فوری اطلاع انتظامیہ کو دیں تاکہ قیمتی جانوں کے تحفظ کو یقینی بنایا جا سکے۔دریں اثنامحکمہ سول ڈیفنس کو ہدایت کی گئی ہے کہ ضبط شدہ سلنڈرز کو محفوظ طریقے سے تلف کرنے کے لیے فوری اقدامات کرے تاکہ کسی بھی ممکنہ حادثے سے بچا جا سکے۔