خواجہ سلمان رفیق کا داتا درباردورہ، 9 محرم کے غسل مبارک انتظامات کا جائزہ

جمعرات 3 جولائی 2025 19:23

لاہور (اُردو پوائنٹ اخبارتازہ ترین - آن لائن۔ 03 جولائی2025ء) صوبائی وزیر صحت اور چیئرمین کابینہ کمیٹی برائے امن و امان خواجہ سلمان رفیق نے 9 محرم الحرام کو ہونے والے حضرت داتا گنج بخشؒ کے 982 ویں غسل مبارک کی تیاریوں کا جائزہ لینے کیلئے داتا دربار کا دورہ کیا۔ ان کے ہمراہ صوبائی وزیر بلال یاسین بھی موجود تھے۔اس موقع پر کنٹرول روم کا بھی دورہ کیا گیا، جہاں سیکیورٹی اور دیگر انتظامات کا معائنہ کیا گیا۔

دورے کے دوران سیکرٹری داخلہ پنجاب ڈاکٹر احمد جاوید قاضی، سیکرٹری اوقاف ڈاکٹر سید طاہر رضا بخاری، کمشنر لاہور زید بن مقصود، ڈپٹی کمشنر سید موسیٰ رضا، ڈی آئی جی فیصل کامران سمیت دیگر اعلیٰ حکام بھی موجود تھے۔صوبائی وزراء نے حضرت داتا گنج بخشؒ کی قبر مبارک پر حاضری دی، فاتحہ خوانی کی اور ملک و قوم کے لیے دعا کی۔

(جاری ہے)

اس موقع پر غسل مبارک کے انتظامات سے متعلق ایک اجلاس بھی منعقد ہوا، جس میں سیکرٹری اوقاف نے بریفنگ دی۔

خواجہ سلمان رفیق نے کہا کہ وزیراعلیٰ پنجاب مریم نواز شریف کے ویژن کے مطابق غسل مبارک کے انتظامات مکمل کر لیے گئے ہیں۔انہوں نے مزید کہا کہ غسل مبارک کی تقریب کی سی سی ٹی وی کیمروں سے مکمل مانیٹرنگ کی جائے گی جبکہ حکومت نے نائب وزیر اعظم اسحاق ڈار کو بطور مہمان خصوصی شرکت کی دعوت دی ہے۔بلال یاسین نے کہا کہ محرم الحرام کے دوران حکومت پنجاب نے سیکیورٹی کے فول پروف انتظامات کیے ہیں اور صوبے بھر میں دورے کرکے انتظامات کا مسلسل جائزہ لیا جا رہا ہے۔