بینک مکرمہ لمیٹڈ ،بڑے پیمانے پر مزید سرمایہ کاری اور مالی استحکام کے عمل میں تیزی اورمستقبل میں بھرپور ترقی کی نوید

جمعہ 4 جولائی 2025 19:57

کراچی(اُردو پوائنٹ اخبارتازہ ترین - این این آئی۔ 04 جولائی2025ء)بینک مکرمہ لمیٹڈ اپنے سرمایہ میں مزید فراہمی کے حوالے سے مسلسل نمایاں پیش رفت کر رہا ہے، جو اس کے طویل المدتی مالی استحکام اور ترقی کی جانب ایک اہم قدم ہے۔اس مثبت پیش رفت کو مزید تقویت بینک کے معزز سرپرست ناصر عبداللہ حسین لوتاہ کی جانب سے 5 ارب روپے کی جمع کرائی گئی خطیر رقم سے ملی ہے جسے انضباطی منظوریوں کے بعد حصص کی سبسکرپشن کے لیے پیشگی ادائیگی (Advance Against Share Subscription)کے طور پر ریکارڈ کیا جائے گا اور یہ نئی سرمایہ کاری سنہ2023 میں فراہم کردہ 10 ارب روپے کی سرمایہ کاری کے تسلسل میں ہے۔

اس کے علاوہ، بینک میں سرپرست کی جانب سے مزید سرمایہ کاری گلوبل ہالی ڈیولپمنٹ لمیٹڈ کے جو سرپرست کی ملکیت میں ہے بینک مکرمہ میں انضمام کی تجویز میں بھی ظاہر ہوتی ہے۔

(جاری ہے)

ان تمام اقدامات سے،مجموعی طور پر ،ناصر عبداللہ حسین لوتاہ کی جانب سے بینک اور پاکستان کے لیے وقف کردہ سرمایہ 41 ارب روپے تک پہنچ جائے گاجو ان کے عزم اور طویل المدتی وابستگی کا واضح ثبوت ہے۔

بینک اپنے معزز سرپرست،ناصر عبداللہ حسین لوتاہ کا دل کی گہرائیوں سے شکریہ ادا کرتا ہے جنہوں نے مسلسل حمایت اور بصیرت کا مظاہرہ کیا ہے۔اسی کے ساتھ، ایک اور اہم حکمتِ عملی کے تحت، بینک مکرمہ لمیٹڈ کے بورڈ آف ڈائریکٹرز نے کراچی کے علاقے کلفٹن میں واقع کلینن ٹاور (Cullinan Tower) کی 12 ارب روپے کی تصدیق شدہ پیشکش پر فروخت کی منظوری دے دی ہے۔

یہ تاریخی ٹرانزیکشن بینک کے لیے ایک بڑا قدم ہے، جو نہ صرف نمایاں لیکویڈیٹی فراہم کرے گا بلکہ سرمایہ پر منافع کا ذریعہ بھی بنے گا۔اپنی مالی پوزیشن کو مزید مضبوط کرتے ہوئے، بینک جلد ہی اپنے پرانے اور ڈوبے ہوئے قرضوں میں سے 13 ارب روپے سے زائد کی وصولی کے آخری مراحل میں داخل ہو چکا ہے۔یہ متوقع وصولی بھی بینک کی منافع بخش کارکردگی اور سرمایہ جاتی بنیاد پر نمایاں مثبت اثر ڈالے گی۔مذکورہ بالا تمام اقدامات کے نتیجے میں بینک مکرمہ لمیٹڈ کے خالص اثاثہ جات میں تقریبا 50 ارب روپے کا اضافہ متوقع ہے۔یہ پیش رفت ، اپنے صارفین کو بہتر خدمات کی فراہمی کے حوالے سے، بینک کے عزم کو مزید مضبوط کرے گی تاکہ وہ اور پاکستان کے مالیاتی شعبے میں ایک مثر اور نمایاں کردار ادا کرے۔