نویں اور دسویں محرم الحرام میں امام بارگاہوں سے منسلک فیڈرز پرلوڈشیڈنگ نہیں ہوگی، اعلامیہ

جمعہ 4 جولائی 2025 22:40

کوئٹہ (اُردو پوائنٹ اخبارتازہ ترین - اے پی پی۔ 04 جولائی2025ء) کوئٹہ الیکٹرک سپلائی کمپنی(کیسکو)نے نویں اور دسویں محرم الحرام کوکوئٹہ شہر میں امام بارگاہوں سے منسلک فیڈروں کو لوڈشیڈنگ سے مستثنی قراردے دیا ہے۔اس کے علاوہ محرم الحرام کے جلوس والے راستوں میں بجلی کی مسلسل فراہمی اور صارفین کی شکایات کا بروقت ازالہ کیلئے مرکزی مانیٹرنگ و ایمرجنسی کنٹرول سینٹر (ٹیلی فون نمبر 0819201445 اور 0812829753)گھنٹے 3شفٹوں میں مسلسل کام کررہا ہے جوکسی بھی علاقہ میں بجلی منقطع ہونے کی صورت یا شکایت موصول ہونے کے بعد بجلی کی دوبارہ بحالی کیلئے ہنگامی بنیادوں پر اقدامات کرے گا علاوہ ازیں کیسکو مرکزی مانیٹرنگ اورایمرجنسی کنٹرول سینٹرصوبائی حکومت کے ایمر جنسی کنٹرول سینٹر 15 یعنی مددگار سینٹرسے ان متعلقہ فیڈروں کے سلسلے میں بجلی کی صورتحال پربھی رابطہ میں رہے گا۔

(جاری ہے)

کوئٹہ شہر میں امام بارگاہوں سے منسلک فیڈروں مری آباد،سید آباد، گلستان، لیاقت بازارایکسپریس، طوغی روڈ، ہزارہ ٹاون، کرانی،سیٹلائٹ ٹائون اور مغربی بائی پاس فیڈرز کو نویں اور دسویں محرم الحرام میں لوڈشیڈنگ سے مستثنیٰ قراردئیے گئے ہیں البتہ کسی بھی علاقے میں فنی خرابی کو دورکرنے اور بجلی کی دوبارہ بحالی کے لئے تکنیکی ٹیم اور متعلقہ فیڈرکے سب ڈویژنل افسران (ایس ڈی او)اپنے عملہ کے ساتھ دفاترمیں موجودرہیں تاکہ بجلی سے متعلق کسی بھی ایمرجنسی سے بروقت نمٹاجاسکے۔

علاوہ ازیں کوئٹہ شہر سے باہر صوبہ کے دیگر علاقوں میں دسویں محرم الحرام کو امام بارگاہوں سے منسلک فیڈروں پرصبح5بجے سے رات 12بجے تک روجھان جمالی، جھل مگسی، اوستہ محمد، ڈیرہ مرادجمالی، گنداخہ، صحبت پور، بھاگ، سبی،لورالائی،خضدار، مچھ اور ژوب کے علاقوں میں امام بارگاہوں سے منسلک فیڈرز پر لوڈشیڈنگ نہیں کی جائے گی۔