یوم عاشور کے موقع پر سمبڑیال میں سکیورٹی، طبی سہولیات، صفائی اور روشنی کے بہترین انتظامات کیے گئے

پیر 7 جولائی 2025 00:20

سیالکوٹ (اُردو پوائنٹ اخبارتازہ ترین - اے پی پی۔ 07 جولائی2025ء) وزیر اعلیٰ پنجاب مریم نواز شریف کے ویژن کے مطابق یوم عاشور کے موقع پر سمبڑیال میں سیکیورٹی، طبی سہولیات، صفائی اور روشنی کے بہترین انتظامات کیے گئے۔اسسٹنٹ کمشنر سمبڑیال غلام فاطمہ نے ممبر صوبائی اسمبلی پنجاب حناء ارشد وڑائچ ، ایڈیشنل ڈپٹی کمشنر جنرل سیالکوٹ ایوب بخاری اور سب ڈویژنل پولیس آفیسر سمبڑیال سجاد احمد کے ہمراہ تحصیل سمبڑیال میں مرکزی جلوس کے روٹس، امام بارگاہوں، کنٹرول رومز اور فیلڈ پوائنٹس کا دورہ کیا۔

مرکزی جلوس کے داخلی و خارجی راستوں پر سخت سیکیورٹی مہیا کی گئی اور پولیس، ریسکیو 1122، سول ڈیفنس اور محکمہ صحت مکمل طور پر الرٹ رہے۔سی سی ٹی وی کیمروں کے ذریعے جلوسوں کی مسلسل نگرانی کی گئی۔

(جاری ہے)

امن کمیٹی کے ارکان، مجالس اور جلوس روٹس پر موجود رہ کر انتظامیہ سے بھرپور تعاون کرتے رہے۔ عزاداروں کے لیے کلینک آن ویلز، فیلڈ ہسپتال اور میڈیکل اسٹاف ہر لمحہ خدمات انجام دیتے رہے۔

جلوس کے راستوں پر شربت، لیموں پانی، منرل واٹر کی سبیلیں اور نیاز کا انتظام کیا گیا۔صفائی، چھڑکاؤ اور روشنی کے لیے "ستھرا پنجاب" کا اسکواڈ بھی جلوسوں کے ہمراہ رہا۔ایس او پیز پر سختی سے عملدرآمد کروایا گیا۔اس موقع پر اسسٹنٹ کمشنر غلام فاطمہ کا کہنا تھا کہ شہریوں کو مکمل تحفظ، سہولت اور باعزت ماحول کی فراہمی انتظامیہ کی اولین ترجیح ہے۔