حیدرآباد ،10 محرم الحرام کا مرکزی جلوس قدم گاہ سے برآمد ہوکر اپنے روایتی راستوں سے ہوتا ہوا کربلا دادن شاہ پر اختتام پذیر ہوا

حیدرآباد(اُردو پوائنٹ اخبارتازہ ترین - این این آئی۔ 07 جولائی2025ء)ضلع حیدرآباد میں 10 محرم الحرام 2025 یوم عاشورہ کا مرکزی جلوس قدم گاہ سے برآمد ہوا جو اپنے روایتی راستوں سے ہوتا ہوا کربلا دادن شاہ پر اختتام پذیر ہوا۔مرکزی جلوس کی سیکیورٹی کے انتظامات کا جائزہ لینے کیلئے ڈی آئی جی پولیس حیدرآباد رینج طارق رزاق دھاریجو، ایس ایس پی حیدرآباد عدیل حسین، ایس ایس پی انویسٹی گیشن حیدرآباد عبداللہ میمن، ڈویژنل کمشنر حیدرآباد بلال احمد میمن, ڈی سی حیدرآباد زین العابدین میمن، مئیر حیدرآباد کاشف خان شورو کے ہمراہ مرکزی جلوس کا تفصیلی دورہ کیا اور مرکزی جلوس کے سیکیورٹی انتظامات پر اطمینان کا اظہار کیا۔

اے ایس پی در تابش، ڈی ایس پی کینٹ گل حسن تھیبو، ڈی ایس پی سی آئی اے افتخار احمد بریڑو، انچارج DIB انسپکٹر جنید عباسی، انچارج ATF حیدرآباد فہیم فتح سمیت ضلع کے تمام ڈی ایس پیز، ایس ایچ اوز و جوانوں نے سیکیورٹی کے فرائض سرانجام دیئے۔

(جاری ہے)

مرکزی جلوس کیلئے حیدرآباد پولیس کی جانب سے سیکیورٹی کے انتہائی سخت انتظامات کیے گئے ہیں، جلوس کی نگرانی کیلئے ڈی ایس پی سٹی آفس میں کنٹرول روم قائم کیا گیا جہاں جلوس کی CCTV کیمروں کی مدد سے نگرانی کی گئی۔

محرم الحرام یوم عاشورہ کے مرکزی جلوس کی سیکیورٹی پر پولیس کی بھاری نفری سیکیورٹی فرائض کی ادائیگی کیلئے تعینات کی گئی, ATF فورس کے چاک و چوبند کمانڈو دستے مرکزی ماتمی جلوس کے علاوہ اہم مقامات اور بلڈنگ پر تعینات کئے گئے جہاں جوانوں کی سہولت کیلئے چھتری لگائی گئی. جلوس کی سیکیورٹی کو مزید موثر بنانے کیلئے داخلی راستوں پر واک تھروگیٹ لگائے گئے۔

یوم عاشورہ پر امن و امان قائم رکھنے اور کسی بھی ناخوشگوار واقع سے بچنے کیلئے ضلع کے داخلی و خارجی راستوں کے علاوہ شہر کے اہم مقامات اور شاہراوں پر پکٹس قائم کی گئی, مشکوک اشخاص پر نگرانی کیلئے مختلف مقامات پر کرمنل ریکارڈ ائیڈینٹیفیکشن سسٹم لگائے گئے۔قدم گاہ اور دادن شاہ کربلا کے منتظمین نے ایس ایس پی حیدرآباد عدیل حسین چانڈیو کو یوم عاشورہ مرکزی جلوس پر فول پروف سکیورٹی انتظامات فراہم کرتے ہوئے جلوس کو امن و امان سے گزارنے پر مبارکباد پیش کرتے ہوئے سراہا۔ڈی آئی جی پولیس حیدرآباد رینج نے بھی ایس ایس پی حیدرآباد کی قیادت میں ضلع حیدرآباد پولیس کے تمام افسران و جوانوں کو اچھی ڈیوٹی سرانجام دینے پر شاباشی دی۔