وزیراعلی پنجاب کی ہدایت پر کابینہ کمیٹی برائے امن و امان کا سیف سٹیز اتھارٹی کا دورہ

پیر 7 جولائی 2025 20:29

لاہور (اُردو پوائنٹ اخبارتازہ ترین - این این آئی۔ 07 جولائی2025ء)وزیراعلی پنجاب کی ہدایت پر کابینہ کمیٹی برائے امن و امان نے سیف سٹیز اتھارٹی کا دورہ کیا۔ چیئرمین کابینہ کمیٹی و وزیر صحت خواجہ سلمان رفیق، وزیر ہاؤسنگ بلال یاسین اور وزیر خزانہ مجتبیٰ شجاع الرحمن موجود تھے۔ سیکرٹری داخلہ پنجاب ڈاکٹر احمد جاوید قاضی، آئی جی ڈاکٹر عثمان انور، ڈی آئی جی سپیشل برانچ خرم شہزاد اور کمشنر لاہور زید بن مقصود ہمراہ تھے۔

مانیٹرنگ ہال سے پنجاب کے مختلف اضلاع کے مرکزی جلوسوں کی لائیو مانیٹرنگ کی۔ ایم ڈی سیف سٹیز محمد احسن یونس نے اس موقع پر سکیورٹی کی صورتحال بارے بریفنگ دی۔ سیف سٹیز اتھارٹی پنجاب بھر میں 22 ہزار کیمروں سے عاشورہ کی مانیٹرنگ کر رہی ہے۔ اس موقع پر صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے کہا ہے کہ لاہور سمیت پنجاب بھر میں عاشورہ مذہبی عقیدت و احترام کیساتھ گزار رہے ہیں۔

(جاری ہے)

قانون نافذ کرنے والے اداروں کی ان تھک محنت سے پنجاب میں امن کی فضا قائم ہے۔ وزیر اعلیٰ پنجاب کی ہدایت پر کابینہ نے عشرہ محرم انتظامات کی نگرانی کرتے ہوئے فیلڈ میں گزارا۔ صوبائی وزیر بلال یاسین نے کہا ہے کہ پنجاب میں 10 محرم کے 2845 جلوس اور 2502 مجالس کی مکمل مانیٹرنگ کی جا رہی ہے۔ امن و امان کے قیام کیلئے تمام انتطامیہ اور پولیس فیلڈ میں ایکٹو ہیں۔

صوبائی وزیر مجتبیٰ شجاع الرحمن نے کہا ہے کہ محکمہ داخلہ کا سائیبر پٹرولنگ سیل فرقہ واریت میں ملوث افراد کیخلاف ایکشن لے رہا ہے۔ سوشل میڈیا پر فرقہ واریت پھیلانے والوں کے خلاف زیرو ٹالرینس پالیسی پر عمل پیرا ہیں۔ سیکرٹری داخلہ ڈاکٹر احمد جاوید قاضی نے کہا ہے کہ سوشل میڈیا پر فرقہ وارانہ مواد پر 1,834 اکاؤنٹ رپورٹ، 185 افراد گرفتار ہوئے۔ تمام عزاداروں کی بحفاظت واپسی تک ڈیوٹی پر مامور تمام عملہ فیلڈ میں مستعد رہے۔