قومی قوانین و بین الاقوامی ماحولیاتی معیار پر عملدرآمد وقت کی ضرورت ، عالمی سطح پر پائیدار سپلائی چین پر زور بڑھ رہا ہے،ڈپٹی ڈائریکٹر عثمان اظہر

فیصل آباد (اُردو پوائنٹ اخبارتازہ ترین - اے پی پی۔ 09 جولائی2025ء) ڈپٹی ڈائریکٹر ادارہ برائے ماحولیاتی تحفظ فیصل آباد عثمان اظہر نے کہا ہے کہ قومی ماحولیاتی قوانین کے ساتھ ساتھ بین الاقوامی ماحولیاتی معیار پر عملدرآمد وقت کی ضرورت ہے، عالمی سطح پر ماحولیاتی تحفظ اور پائیدار سپلائی چین پر زور بڑھ رہا ہے۔ ان خیالات کا اظہار انہوں نے پاکستان ہوزری مینوفیکچررز اینڈ ایکسپورٹرز ایسوسی ایشن فیصل آباد ریجن کے اجلاس سے خطاب کرتے ہوئے کیا۔

انہوں نے کہا کہ ای پی اے کا کوئی منفی ایجنڈا نہیں اور نہ ہی ہمارا مقصد کسی کو ہراساں کرنا ہے بلکہ ہم سب کو مل کر ماحولیات کے تحفظ کے لیے مشترکہ کوششیں کرنی ہیں۔ ان کا کہنا تھا کہ ہوزری سیکٹر کے ممبران کی رہنمائی کے لیے میرے دروازے ہمیشہ کھلے ہیں تاکہ باہمی افہام و تفہیم سے درپیش مسائل کو حل کیا جا سکے۔

(جاری ہے)

اس موقع پر حاضر خان سینئر وائس چیئرمین پی ایچ ایم اے فیصل آباد نے ایسوسی ایشن کا مختصر تعارف کروایا اور کہا کہ اگر ای پی اے کو کسی ممبر فیکٹری سے متعلق کوئی شکایت ہو تو براہ راست کارروائی کرنے سے پہلے ایسوسی ایشن کو اعتماد میں لیا جائے۔

انہوں نے کہا کہ فیکٹری سیل ہونے کی صورت میں ایکسپورٹ آرڈرز تاخیر کا شکار ہوتے ہیں جس سے نہ صرف آرڈرز منسوخ ہونے کا خطرہ ہوتا ہے بلکہ ملکی زرمبادلہ کو بھی نقصان پہنچتا ہے۔ انہوں نے مکمل یقین دہانی کرائی کہ پی ایچ ایم اے کے تمام ممبران ماحولیاتی تحفظ سے متعلق قوانین اور ضوابط پر مکمل عمل کریں گے۔میاں کاشف ضیا، سابق چیئرمین پی ایچ ایم اے نے کہا کہ محکمہ ماحولیات، وزیر اعلیٰ کے وژن کے مطابق قابل تعریف اقدامات کر رہا ہے۔

انہوں نے کہا کہ ماحولیات کے تحفظ اور صنعتی ترقی میں توازن وقت کی اہم ضرورت ہے، محکمہ ماحولیات کا تعاون خوش آئند ہے اور اس سے صنعتکاروں میں اعتماد پیدا ہو رہا ہے۔ انہوں نے ادارے کے مثبت رویے کو سراہا اور تعاون کے تسلسل کی اُمید ظاہر کی۔انہوں نے کہا کہ سموگ کے متوقع دنوں میں بھی اسی ہم آہنگی سے کام جاری رکھا جائے گا،پی ایچ ایم اے ماحولیاتی تحفظ کے قوانین پر عملدرآمد کو یقینی بنائے گی۔

ایسوسی ایشن ای پی اے کے ساتھ ہر ممکن تعاون جاری رکھے گی تاکہ مسائل باہمی مشاورت سے حل ہوں، ہمارا مقصد ایک ماحول دوست اور پائیدار صنعتی نظام کا قیام ہے۔ سوال و جواب کی نشست میں افتخار باجوہ (باجوہ انڈسٹریز) اور محمد شعیب (ایم اے پراسیسنگ)نے بھرپور شرکت کی۔اجلاس کے اختتام پر حاضر خان نے معزز مہمان عثمان اظہر کوپی ایچ ایم اے کی اعزازی شیلڈ پیش کی۔