سندھ حکومت کا اداکارہ حمیرا اصغر کی تدفین سرکاری سطح پر کرانے کا فیصلہ

ہماری پہلی ترجیح یہی ہے کہ والدین یا قریبی رشتہ دار لاش وصول کریں اگر وہ انکار کریں تو صوبائی حکومت عزت و تکریم کے ساتھ تدفین کے تمام تقاضے پورے کرے گی؛ صوبائی وزیر ثقافت سید ذوالفقار علی شاہ

ساجد علی جمعرات 10 جولائی 2025 15:05

سندھ حکومت کا اداکارہ حمیرا اصغر کی تدفین سرکاری سطح پر کرانے کا فیصلہ

کراچی ( اُردو پوائنٹ اخبارتازہ ترین۔ 10 جولائی 2025ء ) سندھ حکومت نے اداکارہ حمیرا اصغر کی تدفین سرکاری سطح پر کرانے کا فیصلہ کرلیا۔ میڈیا رپورٹس کے مطابق ماڈل و اداکارہ حمیرا اصغر کی لاش ملنے اور ورثاء کے لاش وصول کرنے سے انکار کے بعد صوبائی وزیر ثقافت سید ذوالفقار علی شاہ نے اداکارہ کی تدفین سرکاری سطح پر کرانے کا فیصلہ کیا ہے، اس حوالے سے انہوں نے کہا کہ اگر مرحومہ کے ورثا لاش وصول نہ کریں تو سندھ حکومت بالخصوص محکمہ ثقافت حمیرا اصغر کا قانونی وارث ہوگا اور ان کی تدفین سمیت تمام مراحل کی ذمہ داری اٹھائے گا۔

بتایا گیا ہے کہ صوبائی وزیر نے ایڈیشنل آئی جی کراچی سے فوری رابطہ کیا اور مرحومہ کی لاش حوالگی کے حوالے سے بات کی، انہوں نے ڈائریکٹر جنرل کلچر کو اس معاملے کا فوکل پرسن بھی مقرر کر دیا ہے تاکہ تمام انتظامی امور مربوط انداز میں انجام دیے جا سکیں، اس سلسلے میں سیکریٹری ثقافت سندھ کی جانب سے ڈی آئی جی ساؤتھ کو باضابطہ خط بھی ارسال کیا گیا تاکہ قانونی کارروائی مکمل ہونے کے بعد لاش محکمہ ثقافت کے حوالے کی جا سکے۔

(جاری ہے)

صوبائی وزیر سید ذوالفقار شاہ نے کہا ہے کہ اداکارہ حمیرا اصغر لاوارث نہیں، سندھ حکومت ان کی وارث ہے، یہ ایک دل دہلا دینے والا واقعہ ہے جسے ہم خاموشی سے گزرنے نہیں دیں گے، تدفین کے تمام مراحل بشمول قبرستان کا انتظام محکمہ ثقافت اپنی نگرانی میں مکمل کرے گا، ہماری پہلی ترجیح یہی ہے کہ اداکارہ کے والدین یا دیگر قریبی رشتہ دار لاش وصول کریں لیکن اگر وہ انکار کریں تو حکومت سندھ ان کی عزت و تکریم کے مطابق تدفین کے تمام تقاضے پورے کرے گی، محکمہ ثقافت صوبائی پولیس کے مکمل تعاون سے اس معاملے میں اپنا بھرپور اور مؤثر کردار ادا کرے گا تاکہ مرحومہ کو آخری رسومات کے وقت تنہا نہ چھوڑا جائے۔