بٹگرام، سکیورٹی اور امن و امان کے حوالے سے ڈسٹرکٹ کوآرڈینیشن کمیٹی کا اجلاس

جمعرات 10 جولائی 2025 19:00

بٹگرام (اُردو پوائنٹ اخبارتازہ ترین - اے پی پی۔ 10 جولائی2025ء) ڈپٹی کمشنر بٹگرام آصف علی خان کی زیر صدارت سکیورٹی اور امن و امان کے حوالے سے ڈسٹرکٹ کوآرڈینیشن کمیٹی کا اجلاس منعقد ہوا۔اجلاس میں ایڈیشنل ڈپٹی کمشنر بٹگرام ، ڈسٹرکٹ پولیس آفیسر بٹگرام سمیت تمام ضلعی محکموں کے سربراہان، قانون نافذ کرنے والے اداروں ،انٹیلیجنس اداروں کے نمائندگان نے شرکت کی۔

ڈپٹی کمشنر بٹگرام نے متعلقہ ضلعی محکموں کے افسران اور قانون نافذ کرنے والے اداروں کے درمیان مؤثر رابطہ کاری اور ابھرتے ہوئے سکیورٹی خطرات کا اندازہ لگانے اور ان کے تدارک کیلئے جامع حکمت عملی بنانے پر زور دیا، صوبائی حکومت خیبر پختونخوا کی صوبائی ایکشن پلان پر سختی سے عمل درآمد کرنے کی ہدایت کی اور اُن ہدایات کے تناظر میں تمام ضلعی محکموں کی کارکردگی کا جائزہ لیا گیا۔

(جاری ہے)

ڈپٹی کمشنر بٹگرام نے شرکاء کو ہدایت کی کہ ضلع بٹگرام کی ترقی و خوشحالی اور امن و امان کیلئے تمام اداروں کےساتھ مل کر مربوط لائحہ عمل بنا کر عمل کیا جائے،عوام الناس سے روابط مزید مؤثر اور مضبوط بنایا جائے تاکہ عوام کو بروقت سہولیات اور ریلیف مہیا ہو سکے۔ انہوں نے واضح کیا کہ صوبائی حکومت کی اولین ترجیح عوامی فلاح و بہبود ہے اور اس مقصد کے لیے تمام اداروں کی کارکردگی کی سخت مانیٹرنگ کی جائے گی۔ اجلاس میں اس امر کا اعادہ کیا گیا کہ تمام دستیاب وسائل کو بروئے کار لاکر عوام کو ان کی دہلیز پر بنیادی سہولیات فراہم کی جائیں گی۔