19 جولائی کوتاجروں کی ملک گیر ہڑتال کی بھرپور حمایت کرتے ہیں، کاٹی

پالیسی سازوں کے یکطرفہ فیصلہ سے معیشت تباہ، ملک بھر کی تاجر تنظیمیں متحد ہیں، صدر جنید نقی

جمعہ 11 جولائی 2025 20:35

کراچی (اُردو پوائنٹ اخبارتازہ ترین - این این آئی۔ 11 جولائی2025ء) کورنگی ایسوسی ایشن آف ٹریڈ اینڈ انڈسٹری(کاٹی) کے صدر جنید نقی نے کراچی چیمبر آف کامرس اینڈ انڈسٹری (کے سی سی آئی) کی قیادت میں تاجر برادری کی 19 جولائی کو ملک گیر پرامن ہڑتال کے اعلان کی حمایت کردی۔ انہوں نے تاجروں کے مؤقف کو بروقت، جائز اور کاروباری طبقے کے حقیقی جذبات کی عکاسی قرار دیا ہے۔

صدر کاٹی نے کہا کہ موجودہ فنانس ایکٹ میں شامل کیے گئے کاروبار دشمن اقدامات نے صنعت و تجارت کی فضا کو شدید طور پر متاثر کیا ہے اور اب خاموشی کا مطلب معیشت کی مزید بربادی ہوگا۔ جنید نقی نے کہا کہ ہم کراچی چیمبر کے فیصلے کی بھرپور حمایت کرتے ہیں، کیونکہ حکومت نے جو سخت اور غیر عملی پالیسیاں متعارف کرائی ہیں، وہ تاجر، ایس ایم ایز اور صنعتکار سب کے لیے ناقابل قبول ہیں۔

(جاری ہے)

نقد لین دین پر پابندی، بلاجواز گرفتاری کے اختیارات، اور ڈیجیٹل انوائسنگ جیسے اقدامات کاروبار کے لیے خطرے کی گھنٹی ہیں۔انہوں نے مزید کہا کہ کاروباری طبقے کو مشورے میں شامل کیے بغیر یکطرفہ فیصلے کرنا پالیسی سازوں کی دور اندیشی کے فقدان کو ظاہر کرتا ہے، اور یہ رویہ ملکی معیشت کو غیر رسمی اور غیر منظم شعبوں کی طرف دھکیل رہا ہے۔صدر کاٹی نے حکومت سے پرزور مطالبہ کیا کہ وہ فوری طور پر فنانس ایکٹ میں شامل ان غیر منطقی شقوں کا نظرِثانی کرے اور تاجر برادری سے سنجیدہ مشاورت کا آغاز کرے۔

انہوں نے کہا کہ کاٹی سمیت ملک بھر کی صنعت و تجارت سے وابستہ تنظیمیں اس پرامن احتجاج کے ساتھ کھڑی ہیں، تاکہ حکومت کو واضح پیغام دیا جا سکے کہ کاروباری مفادات کو نظرانداز نہیں کیا جا سکتا۔جنید نقی نے کہا کہ یہ صرف ایک احتجاج نہیں بلکہ معیشت کے تحفظ کی جدوجہد ہے، جس میں پورا کاروباری طبقہ متحد ہے۔