وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ کی زیرصدارت اجلاس

اسلام آباد (اُردو پوائنٹ اخبارتازہ ترین - اے پی پی۔ 11 جولائی2025ء) وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے حکومت کے شمولیتی ڈیجیٹل تبدیلی کے عزم کا اعادہ کرتے ہوئے اس امر پر زور دیا ہے کہ معذور افراد کے لئے رسائی بہتر بنانے کی خاطر مصنوعی ذہانت اور وائس کمانڈ فیچرز سے لیس ایک جامع “سپر ایپ” تیار کی جائے۔

جمعہ کو وزارت آئی ٹی وٹیلی کمیونیکیشن سے جاری کردہ بیان کے مطابق وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ کی زیر صدارت ایک اعلیٰ سطحی اجلاس منعقد ہوا جس میں سماعت سے محروم افراد کے لیے مصنوعی ذہانت سے تقویت یافتہ اشاروں کی زبان کے حل کے ذریعے رابطے کی رسائی بہتر بنانے کے امکانات پر غور کیا گیا۔

(جاری ہے)

اجلاس میں وفاقی سیکرٹری اطلاعات و نشریات عنبرین جان، وزارت اطلاعات و نشریات، وزارت آئی ٹی، اگنائٹ اور سٹارٹ اپ نظام سے وابستہ نمائندگان نے شرکت کی۔

دو نمایاں پاکستانی سٹارٹ اپس کنکٹ ہئیر اورڈیف ٹاک نے اپنے جدید پلیٹ فارمز پیش کئے جن میں حقیقی وقت میں اشاروں کی زبان کی ترجمانی، مصنوعی ذہانت پر مبنی رابطہ کاری کے آلات اور آف لائن پبلک الرٹ سروسز شامل تھیں۔یہ اجلاس نیشنل پالیسی بورڈ کی جانب سے 2022 کے “Access to Media (Deaf) Persons Act” کے تحت حال ہی میں تشکیل دی گئی ذیلی کمیٹی برائے آئی ٹی کے تحت منعقد ہوا۔

اس کمیٹی کی صدارت بھی وفاقی وزیر شزا فاطمہ خواجہ کر رہی ہیں اور اس کا مقصد اشاروں کی زبان پر مبنی مصنوعی ذہانت پریکٹسز کا جائزہ لینا اور پبلک میڈیا پلیٹ فارمز کے لیے قابل رسائی ٹیکنالوجی کی سفارش کرنا ہے۔اجلاس کے دوران سیکرٹری وزارتِ اطلاعات و نشریات نے تجویز دی کہ پی ٹی وی پر ایک پائلٹ پراجیکٹ کے طور پر ایک روزانہ خبرنامہ کا انتخاب کیا جائے جس میں مصنوعی ذہانت پر مبنی اشاروں کی زبان کی ترجمانی کی جائے۔

اگنائٹ نے اس مرحلہ وار نقطہ نظر کی حمایت کی اور اس بات پر زور دیا کہ ٹیکنالوجی پر اعتماد بڑھانے کے لیے قابل پیمائش نتائج پر توجہ دی جائے۔فیصلہ کیا گیا کہ Hear Connect اور Deaf Tawk وزارت آئی ٹی کے تعاون مشترکہ طور پرایک ثبوت تصور(Proof of Concept) تیارکریں گے ،اگنائٹ یہ بھی دیکھے گا کہ آیا انکیوبیشن سینٹرز کے ذریعہ ایک قومی انوویشن چیلنج شروع کیا جا سکتا ہے تاکہ مزید ٹیکنالوجی پر مبنی حل سامنے آ سکیں۔

وفاقی وزیر شزا فاطمہ خواجہ نے سٹارٹ اپس کی کاوشوں کو سراہا اور حکومت کی شمولیتی ڈیجیٹل تبدیلی کے عزم کا اعادہ کیا۔ انہوں نے اس امر پر زور دیا کہ معذور افراد کے لیے رسائی بہتر بنانے کی خاطر مصنوعی ذہانت اور وائس کمانڈ فیچرز سے لیس ایک جامع ’’سپر ایپ‘‘ تیار کی جائے۔ اجلاس باہمی وزارتی تعاون کے فروغ اور قومی میڈیا و عوامی خدمات میں ڈیجیٹل شمولیت کے لیے قابل توسیع، جدید آلات کی حمایت پر اتفاق رائے کے ساتھ اختتام پذیر ہوا۔