وزیر اعلیٰ بلوچستان میر سرفراز بگٹی سے رکن صوبائی اسمبلی پرنس آغا عمر جان احمدزئی کی ملاقات

جمعہ 11 جولائی 2025 23:00

کوئٹہ (اُردو پوائنٹ اخبارتازہ ترین - اے پی پی۔ 11 جولائی2025ء) وزیر اعلیٰ بلوچستان میر سرفراز بگٹی سے رکن صوبائی اسمبلی پرنس آغا عمر جان احمدزئی نے ملاقات کی، ملاقات میں باہمی دلچسپی کے مختلف امور سمیت صو بہ کی مجموعی سیاسی و ترقیاتی صورتحال پر تفصیلی تبادلہ خیال کیا گیا، پرنس آغا عمر جان احمدزئی نے وزیر اعلیٰ بلوچستان میر سرفراز بگٹی کا خصوصی طور پر شکریہ ادا کیا کہ ان کی تجویز پر حلقہ پی بی ـ46 میں لنک میاں غنڈی روڈ (Nـ25 سے Nـ65 تیرہ میل روڈ) کو کوئٹہ پیکج میں شامل کرکے منظوری دی گئی جو علاقہ کی ترقی اور عوامی فلاح کے لیے ایک اہم پیش رفت ہے ،وزیر اعلیٰ میر سرفراز بگٹی نےکہا کہ صو بہ کے تمام حلقوں میں مساوی ترقی حکومت کی اولین ترجیح ہے اور عوامی نمائندوں کی مشاورت سے ترقیاتی منصوبوں کو آگے بڑھایا جا رہا ہے ۔

(جاری ہے)

انہوں نے کہا کہ بلوچستان کے پسماندہ علاقوں میں سڑکوں، انفراسٹرکچر اور دیگر بنیادی سہولیات کی فراہمی حکومت کی سنجیدہ پالیسی کا حصہ ہے اور اس ضمن میں عملی اقدامات جاری رہیں گے۔