معروف شاعر، نغمہ نگار، فلم ساز سیف الدین سیف کو دنیا چھوڑے 32برس بیت گئے

ہفتہ 12 جولائی 2025 14:47

لاہور(اُردو پوائنٹ اخبارتازہ ترین - این این آئی۔ 12 جولائی2025ء)معروف شاعر، نغمہ نگار اور فلم ساز سیف الدین سیف کو مداحوں سے بچھڑے 32برس بیت گئے۔ممتاز شاعر سیف الدین سیف 20مارچ 1922 کو امرتسر کے ادبی گھرانے میں پیدا ہوئے، قیام پاکستان کے بعد وہ ہجرت کر کے پاکستان آگئے اور لاہور میں فلم نگری سے وابستہ ہو گئے۔سیف الدین سیف نے بے شمار خوبصورت گیت لکھے، انہوں نے فلم ہچکولے، 7لاکھ، امرا جان ادا، انارکلی، نویلی دلہن، لخت جگر، تہذیب، انجمن اور شمع پروانہ سمیت بے شمار فلموں کیلئے نغمات تحریر کیے۔

(جاری ہے)

اپنے ذاتی ادارے رہنما فلمز کے تحت فلمیں بھی بنائیں جن میں 7لاکھ اور کرتار سنگھ شامل ہیں، سیف الدین سیف نے فلمی دنیا میں رہنے کے باوجود ادب سے رابطہ استوار رکھا۔ان کے مجموعہ کلام میں خم کا کل، کف گل فروش اور دور دراز شامل ہیں، ان کی شاعری سماج کے مسائل اور زندگی کے حقائق کو حقیقت پسندانہ انداز میں بیان کرنے میں کمال رکھتی ہے۔سیف الدین سیف 12جولائی1993 کو اپنے مداحوں کو افسردہ چھوڑ کر اس دنیا سے کوچ کر گئے اور ماڈل ٹاؤن لاہور کے قبرستان میں آسودہ خاک ہیں، آج بھی خوبصورت شاعر کی غزلوں اور گیتوں کی گونج ان کے چاہنے والوں کی سماعتوں میں گونج رہی ہیں۔