کراچی، کے ایم سی دفتر میں چوری، نایاب جنگی شیلڈ اور قیمتی اشیا غائب، سیکیورٹی پر سوالات اٹھ گئے

ڈی جی پارکس آفس سے چوری ہونے والی شیلڈ جنگی تاریخ کی ایک نایاب یادگار سمجھی جاتی تھی،خے ایم سی حکام

ہفتہ 12 جولائی 2025 20:40

کراچی(اُردو پوائنٹ اخبارتازہ ترین - این این آئی۔ 12 جولائی2025ء)کراچی میٹروپولیٹن کارپوریشن(کے ایم سی)کے ڈی جی پارکس کے دفتر میں چوری کی واردات نے سیکیورٹی انتظامات پر سنگین سوالات کھڑے کر دیئے ہیں۔ چور دفتر کی کھڑکی توڑ کر اندر داخل ہوئے اور نایاب جنگی شیلڈ سمیت قیمتی اشیا لے کر فرار ہوگئے۔فاطمہ جناح روڈ پر واقع ڈی جی پارکس کے دفتر کو محرم الحرام کی تعطیلات کے باعث 4 جولائی کو بند کیا گیا تھا، جو 7 جولائی کو دوبارہ کھولا گیا۔

واپسی پر دفتر کی پچھلی کھڑکی ٹوٹی ہوئی ملی، جبکہ اندر سے تاریخی اور قیمتی اشیا غائب پائی گئیں۔ذرائع کے مطابق چور دفتر سے دوسری اشیا کے ساتھ جنگِ عظیم کی ایک نایاب شیلڈ، نلکے، ٹوٹیاں اور ڈی وی ڈی پلیئر بھی چرا کر لے گئے۔ دفتر کے عملے نے واقعے کی اطلاع فوری طور پر پولیس کو دی، جس پر آرٹلری میدان تھانے میں مقدمہ درج کر لیا گیا ہے۔

(جاری ہے)

چوری کی اس واردات کو نہ صرف غیرمعمولی چوری قرار دیا جا رہا ہے بلکہ ایک تاریخی نقصان بھی سمجھا جا رہا ہے، کیونکہ ڈی جی پارکس آفس سے چوری ہونے والی شیلڈ جنگی تاریخ کی ایک نایاب یادگار سمجھی جاتی تھی۔

اعلی حکام نے واقعے کا فوری نوٹس لیتے ہوئے رپورٹ طلب کر لی ہے، جبکہ کے ایم سی ذرائع کے مطابق سیکیورٹی کے معاملات کا ازسرِنو جائزہ لیا جا رہا ہے تاکہ آئندہ ایسی کسی واردات سے بچا جا سکے۔