صوبائی وزیر خزانہ و معدنیات کے زیر صدارت آل پارٹیز اجلاس، ضلع خاران کے مجموعی مسائل، امن و امان کی صورتحال ، ترقیاتی امور پر مشاورت

اتوار 13 جولائی 2025 19:00

خاران (اُردو پوائنٹ اخبارتازہ ترین - اے پی پی۔ 13 جولائی2025ء) صوبائی وزیر خزانہ و معدنیات میر شعیب نوشیروانی اور ڈپٹی کمشنر خاران منیر احمد سومرو کی زیر صدارت ڈپٹی کمشنر آفس خاران میں ایک اہم آل پارٹیز اجلاس منعقد ہوا۔اجلاس میں ضلع خاران کی تمام سیاسی جماعتوں کے رہنماؤں انجمن تاجران اور سرکاری آفیسران نے شرکت کی۔اجلاس کا بنیادی مقصد ضلع خاران کے مجموعی مسائل، امن و امان کی صورتحال، اور ترقیاتی امور پر مشاورت کرنا تھا۔

اجلاس کے دوران تمام شرکاء نے کھل کر اپنی آرا پیش کیں اور مختلف عوامی مسائل کو اجاگر کیا۔اس موقع پر صوبائی وزیر خزانہ و معدنیات میر شعیب نوشیروانی نے خطاب کرتے ہوئے کہا ضلع خاران کی ترقی، خوشحالی اور امن کے لیے تمام سیاسی جماعتوں کو ایک پلیٹ فارم پر متحد دیکھنا میرا خواب نہیں بلکہ میرا وژن ہے، ہم سب کو باہمی مشاورت، رواداری اور ہم آہنگی کے جذبے کے ساتھ آگے بڑھنا ہوگا تاکہ آنے والی نسلوں کے لیے ایک روشن مستقبل یقینی بنایا جا سکے۔

(جاری ہے)

انہوں نے تمام سیاسی نمائندوں کی شرکت کو خوش آئند قرار دیتے ہوئے اس امر پر زور دیا کہ اختلافات کے بجائے اشتراک عمل کو فروغ دیا جائے تاکہ مسائل کا دیرپا حل نکل سکے۔اجلاس کے اختتام پر شرکاء نے اس عزم کا اظہار کیا کہ ضلع خاران کی بہتری اور عوامی فلاح کے لیے ہر ممکن تعاون جاری رکھا جائے گا۔\378