آموں کی نمائش اورمارکیٹنگ میں اضافہ سے برآمدات دوگنا کی جا سکتی ہیں،ماہرین اثمار جامعہ زرعیہ فیصل آباد

پیر 14 جولائی 2025 14:55

فیصل آباد (اُردو پوائنٹ اخبارتازہ ترین - اے پی پی۔ 14 جولائی2025ء) جامعہ زرعیہ فیصل آباد کے ماہرین اثمارنے کہا کہ قومی و بین الاقوامی سطح پر آموں کی نمائش اور مارکیٹنگ کے ذریعے اس کی پیداوار اور برآمدات میں دوگنا اضافہ کرکے کثیرزرمبادلہ کمانے کی راہ ہموار کی جا سکتی ہے۔ انہوں نے کہا کہ مقامی طور پرآموں کی ویلیو ایڈیشن کو فروغ دےکر کسان کی آمدنی میں خاطر خواہ اضافہ کرنے سے نئی نسل کو کاشتکاری کے شعبہ سے جوڑے رکھنے میں خاطر خواہ کامیابی حاصل ہوگی۔

انہوں نے کہا کہ دنیا کے ہر خطے میں پاکستانی آموں کے شوقین افراد موجود ہیں لیکن بین الاقوامی سطح پر اس کی برآمدمیں بڑی رکاوٹ کوالٹی کے وہ پیمانے ہیں جن کے نہ ہونے سے پاکستان ایک بڑے زرمبادلہ سے محروم رہتا ہے لہٰذامتعلقہ اداروں کے لئے ضروری ہے کہ وہ اس حوالے سے کسانوں کے لئے تربیتی پروگرامز کا انعقاد کریں تاکہ فارم کی سطح پر ہی ان تمام پروٹوکولز پر عملدرآمد یقینی بناکر اس کی برآمدات میں اضافہ کیا جا سکے۔

(جاری ہے)

انہوں نے کہا کہ آم کی ویلیو ایڈیشن کرکے اسے صارفین تک پورا سال حقیقی ذائقے، خوشبو اور مٹھاس کے ساتھ پہنچاکراس سے وابستہ کاروبار کو فروغ دیا جا سکتا ہے۔ انہوں نے کہا کہ آم کی فی ایکڑ پیداوار میں اضافہ کےساتھ ساتھ دنیا بھر میں پسند کی جانے والی قسموں کے نئے باغات سائنسی بنیادوں پرلگائے جانے چاہئیں تاکہ فی ایکڑ پودوں میں اضافہ کی ٹیکنالوجی کے ذریعے فی پوداپیداوار بڑھا کر کسان کی معاشی حالت میں بہتری لائی جا سکے۔