بھارت میں سموسے اور جلیبی سگریٹ جیسے مضرِ صحت قرار

کھانوں میں استعمال ہونے والے تیل، چینی اور چربی کی اعلی سطح کو اجاگر کیا جائے گا،انتباہی بورڈ

منگل 15 جولائی 2025 21:54

نئی دہلی (اُردو پوائنٹ اخبارتازہ ترین - این این آئی۔ 15 جولائی2025ء)بھارتی وزارت صحت نے سموسے اور جلیبی کو سگریٹ جیسے مضرِ صحت قرار دے دیا۔بھارتی میڈیا رپورٹس کے مطابق غیر صحت بخش کھانوں سے متعلق آگاہی مہم کا آغاز کر دیا ہے۔بھارتی وزارت صحت نے سموسے اور جلیبی جیسی میٹھی، چکنائی اور تلی ہوئی اشیا خرد و نوش کے خلاف سرکاری اداروں میں انتباہی بورڈ لگانے کا اعلان کیا ۔

(جاری ہے)

بھارتی شہر ناگپور کے حکام نے اپنی نوعیت کا پہلا و منفرد اقدام اٹھاتے ہوئے سموسے، جلیبی، پکوڑے، وڈا پا اور چائی بسکٹ جیسے شوق سے کھائے جانے والے کھانوں کے خلاف جلد ہی سگریٹ نوشی کے طرز کی صحت سے متعلق انتباہی بورڈ لگا رہی ہے۔ان انتباہی بورڈ کے ذریعے ان کھانوں میں استعمال ہونے والے تیل، چینی اور چربی کی اعلی سطح کو اجاگر کیا جائے گا۔حکام کے مطابق اس مہم کا آغاز ناگپور سے کیا جارہا ہے بعدازاں دیگر شہروں میں بھی اس پر عملدرآمد کیا جائے گا۔