کچے کے علاقے میں آپریشنز کیلئے 1 ارب روپے کے فنڈز سے جدید آلات کی خریداری کی منظوری

لاہور(اُردو پوائنٹ اخبارتازہ ترین - این این آئی۔ 15 جولائی2025ء)محکمہ داخلہ پنجاب میں کابینہ کمیٹی برائے امن و امان کا 33 واں اجلاس ہوا۔ صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے اجلاس کی صدارت کی جبکہ صوبائی وزرا ملک صہیب احمد بھرتھ اور چوہدری شافع حسین نے اجلاس میں خصوصی طور پر شرکت کی۔ اجلاس کے دوران صوبہ بھر کی سکیورٹی صورتحال کا تفصیلی جائزہ لیا گیا۔

سیکرٹری داخلہ پنجاب ڈاکٹر احمد جاوید قاضی اور قانون نافذ کرنے والے اداروں نے بریفنگ دی۔ اجلاس میں عشرہ محرم الحرام کے دوران محکمہ داخلہ اور قانون نافذ کرنے والے اداروں کی کارکردگی کو سراہا گیا۔ اجلاس کے دوران کچے کے علاقہ میں پولیس کو وسائل کی فراہمی بارے تجاویز زیر غور آئیں۔

(جاری ہے)

کابینہ کمیٹی نے وزیراعلی پنجاب کی ہدایت کے مطابق کچے کے علاقے میں آپریشنز کیلئے 1 ارب روپے کے فنڈز سے جدید آلات کی خریداری کی منظوری دی۔

کچے کے علاقے میں آپریشنز کیلئے نئی ٹریک اے پی سیز بھی خریدی جائیں گی۔ اسی طرح کابینہ کمیٹی نے اٹک اور ڈی جی خان میں رینجرز کے 1، 1 ونگ کی تعیناتی کی منظوری دی جبکہ میانوالی میں رینجرز کی تعیناتی میں 3 ماہ کی توسیع بھی دی گئی۔ کابینہ کمیٹی برائے امن و امان نے مختلف اضلاع کیلئے 90 پرائس کنٹرول مجسٹریٹس کی تعیناتی کی منظوری دی۔ صوبائی وزیر صحت و چیرمین کابینہ کمیٹی برائے امن و امان خواجہ سلمان رفیق نے اس موقع پر کہا کہ پنجاب بھر میں عوام کے جان و مال کا تحفظ یقینی بنایا جا رہا ہے۔

انہوں نے کہا کہ ہمارے تحفظ کیلئے اپنی جانوں کا نذرانہ پیش کرنے والے اہلکار ہمارے محسن اور قومی ہیرو ہیں۔ بلوچستان سے واپس آتے ہوئے پنجاب سے تعلق رکھنے والے 9 بے گناہ شہریوں کو شہید کر کے درندگی کا مظاہرہ کیا گیا۔ چوہدری شافع حسین نے کہا کہ حکومت پنجاب تمام شہدا کے اہل خانہ سے رابطے میں ہے اور قانون کے مطابق بھرپور امداد فراہم کر رہے ہیں۔

اجلاس میں شہدا کے درجات کی بلندی کیلئے دعا کی گئی۔ چوہدری شافع حسین نے کہا کہ قیام امن کیلئے پنجاب پولیس کو جدید اسلحہ سے لیس کرنا وقت کی اہم ضرورت ہے۔ صوبائی وزیر قانون ملک صہیب احمد بھرتھ نے کہا کہ محرم الحرام کے دوران سوشل میڈیا پر فرقہ واریت پھیلانے والوں کو قانون کے شکنجے میں لانے پر محکمہ داخلہ کا کردار لائق تحسین ہے۔ انہوں نے کہا کہ کچے کے علاقہ میں پولیس کو جدید آلات کے استعمال بارے ضروری تربیت کروائی جائے گی۔

سیکرٹری داخلہ پنجاب ڈاکٹر احمد جاوید قاضی نے کہا کہ کچے کے علاقے میں آپریشنز کی کامیابی کیلئے پولیس کو تمام تر وسائل فراہم کر رہے ہیں اور شہریوں کیساتھ پولیس اہلکاروں کی حفاظت بھی نہایت اہم ہے۔ کابینہ کمیٹی کے 33ویں اجلاس میں سیکرٹری داخلہ پنجاب ڈاکٹر احمد جاوید قاضی، ایڈیشنل آئی جی پولیس، سپیشل سیکرٹری داخلہ فضل الرحمان، سی ٹی ڈی، سپیشل برانچ اور متعلقہ اداروں سے حکام نے شرکت کی۔ ایڈیشنل چیف سیکرٹری جنوبی پنجاب فواد ہاشم ربانی اور ایڈیشنل آئی جی جنوبی پنجاب محمد کامران خان بھی اجلاس میں شریک ہوئے۔ اسی طرح پنجاب کے سرحدی ڈویڑنز اور اضلاع سے کمشنرز، ڈپٹی کمشنرز، آر پی اوز اور ڈی پی اوز نے ویڈیو لنک کے ذریعے اجلاس میں شرکت کی اور تجاویز پیش کیں۔