سپیکر قومی اسمبلی کا حالیہ شدید بارشوں کے نتیجے میں قیمتی انسانی جانوں کے ضیاع اور املاک کے نقصان پر اظہار افسوس

بدھ 16 جولائی 2025 20:40

اسلام آباد (اُردو پوائنٹ اخبارتازہ ترین - اے پی پی۔ 16 جولائی2025ء) سپیکر قومی اسمبلی سردار ایاز صادق نے ملک کے مختلف حصوں میں حالیہ شدید بارشوں کے نتیجے میں قیمتی انسانی جانوں کے ضیاع اور املاک کے نقصان پر دلی افسوس اور رنج و غم کا اظہار کیا ہے۔ سپیکر قومی اسمبلی نے جاں بحق ہونے والے افراد کے اہلِخانہ سے دلی ہمدردی اور تعزیت کا اظہار کرتے ہوئے کہا کہ وہ اس دکھ کی گھڑی میں ان کے ساتھ برابر کے شریک ہیں۔

سپیکر سردار ایاز صادق نے کہا کہ قدرتی آفات پوری قوم کے لئے ایک بڑی آزمائش ہوتی ہیں اور ایسے وقت میں قومی یکجہتی، اتحاد اور ہمدردی کا مظاہرہ نہایت ضروری ہے۔انہوں نے کہا کہ پوری قوم متاثرین کے ساتھ کھڑی ہے اور اس مشکل وقت میں ہم سب کو ایک دوسرے کا سہارا بننا ہوگا۔

(جاری ہے)

سپیکر ایاز صادق نے وفاقی اور صوبائی اداروں پر زور دیا کہ وہ امدادی سرگرمیوں کو مزید تیز، مربوط اور مؤثر بنائیں تاکہ متاثرہ خاندانوں کو بروقت مدد فراہم کی جا سکے۔

انہوں نے کہا کہ متاثرین کو فوری طور پر رہائش، خوراک، طبی امداد اور دیگر بنیادی سہولیات فراہم کی جائیں۔انہوں نے نوجوانوں پر زور دیا کہ وہ رضاکارانہ بنیادوں پر امدادی سرگرمیوں میں بڑھ چڑھ کر حصہ لیں اور متاثرہ علاقوں میں لوگوں کی مدد کے لئے ہر ممکن کوشش کریں۔سپیکر قومی اسمبلی نے اللہ تعالیٰ سے جاں بحق افراد کے درجات کی بلندی، زخمیوں کی جلد صحت یابی اور سوگواران کے لئے صبر جمیل کی دعا کی۔