رواں سال ہیلمٹ کی خلاف ورزی پر 4لاکھ 82 ہزار سے زائد شہریوں کو چالان ٹکٹ جاری

صوبہ بھر میں بغیر سیٹ بیلٹ گاڑی چلانے پر 1 لاکھ 74 ہزار سے زائد چالان ٹکٹ جاری ہوئے‘ ترجمان

جمعرات 17 جولائی 2025 12:30

لاہور(اُردو پوائنٹ اخبارتازہ ترین - این این آئی۔ 17 جولائی2025ء)ڈی آئی جی ٹریفک محمد وقاص نذیر کے احکامات پر بغیر ہیلمٹ اور سیٹ بیلٹ کی خلاف ورزیوں پر کاروائیاں جاری ہیں۔ ترجمان کے مطابق رواں سال صوبہ بھر میں ہیلمٹ کی خلاف ورزی پر 4لاکھ 82 ہزار سے زائد شہریوں کو چالان ٹکٹ جاری کئے گئے ،لاہور ٹریفک پولیس نے ہیلمٹ کی خلاف ورزی پر 1 لاکھ 20ہزار سے زائد شہریوں کے چالان کیے ،رواں سال صوبہ بھر میں بغیر سیٹ بیلٹ گاڑی چلانے پر 1 لاکھ 74 ہزار سے زائد چالان ٹکٹ جاری ہوئے۔

سال 2025 میں سیٹ بیلٹ کی خلاف ورزیوں پر گزشتہ سال کی نسبت 638 فیصد زیادہ کاروائیاں کی گئی۔ڈی آئی جی ٹریفک محمد وقاص نذیر نے کہا کہ صوبہ بھر میں ہیلمٹ اور سیٹ بیلٹ کی خلاف ورزیوں پر کاروائیاں سختی سے جاری ہیں،ہیلمٹ اور سیٹ بیلٹ کی پاسداری کا مقصد چالان نہیں بلکہ قیمتی جانوں کا تحفظ ہے، ایکسیڈینٹ کی صورت میں ہیلمٹ کا استعمال ہیڈ انجری سے محفوظ رکھتا ہے، گاڑی میں سوار تمام افراد سیٹ بیلٹ کا استعمال یقینی بنائیں، قیمتی جانوں کے تحفظ کے لیے ہرممکنہ کوشش کی جا رہی ہے۔

(جاری ہے)

ڈی آئی جی ٹریفک محمد وقاص نذیر نے کہا کہ روڈ سیفٹی کمپینز کا سلسلہ پنجاب کے تمام اضلاع سمیت تحصیل ہائے میں بھی جاری ہے، ٹریفک قوانین پر عمل پیرا ہو کر اپنی اور دوسروں کی جان کو محفوظ بنائیں۔